Amerikalik televideniye va radio boshlovchisi Larri King 87 yoshida vafot etdi, deb xabar berdi Meduza.
Ma’lum qilinishicha, boshlovchi 23-yanvar kuni ertalab Los-Anjelesdagi Sidars-Sinay tibbiyot markazida vafot etdi.
Yanvar oyi boshida Larri King koronavirus sabab shifoxonaga joylashtirilgan. Ilgari boshlovchi sog‘lig‘ida bir necha bor jiddiy muammolarga duch kelgan. Masalan, unga diabet kasalligi tashxisi qo‘yilgan, bir necha bor yurak xurujiga uchragan, shuningdek, 2017-yilda o‘pka saratoni sabab davolanish kursi olgan.
Larri King siyosatchilar, ishbilarmonlar va boshqa taniqli shaxslar bilan suhbatlari bilan tanilgan. 1985-yildan 2010-yilgacha u CNN telekanalida ishlagan. 2012-yildan beri u Hulu telekanalida Larri King Now shousini olib borgan.
Ma’lumot uchun, 2000-yilda Larri Kingning CNN telekanalidagi shousida Rossiya prezidenti Vladimir Putin ishtirok etgan. Suhbatning boshida boshlovchi Kursk suvosti kemasiga nima bo‘lganini so‘ragan. Bunga Putin tabassum bilan “U g‘arq bo‘ldi”, deb javob bergan. Ushbu ibora suhbatning eng esda qolarli qismiga aylangan.
Avvalroq Rim papasining shaxsiy shifokori hamda Jeyms Bondning ma’shuqasi rolini ijro etgan aktrisa Tanya Roberts vafot etgani haqida xabar berilgandi.
Izoh (0)