Америкалик таниқли телебошловчи Ларри Кинг вафот этди

Америкалик телевидение ва радио бошловчиси Ларри Кинг 87 ёшида вафот этди, деб хабар берди Meduza.

Маълум қилинишича, бошловчи 23 январь куни эрталаб Лос-Анжелесдаги Сидарс-Синай тиббиёт марказида вафот этди.

Январь ойи бошида Ларри Кинг коронавирус сабаб шифохонага жойлаштирилган. Илгари бошловчи соғлиғида бир неча бор жиддий муаммоларга дуч келган. Масалан, унга диабет касаллиги ташхиси қўйилган, бир неча бор юрак хуружига учраган, шунингдек, 2017 йилда ўпка саратони сабаб даволаниш курси олган.

Ларри Кинг сиёсатчилар, ишбилармонлар ва бошқа таниқли шахслар билан суҳбатлари билан танилган. 1985 йилдан 2010 йилгача у CNN телеканалида ишлаган. 2012 йилдан бери у Ҳулу телеканалида Larri King Now шоусини олиб борган.

Маълумот учун, 2000 йилда Ларри Кингнинг CNN телеканалидаги шоусида Россия президенти Владимир Путин иштирок этган. Суҳбатнинг бошида бошловчи Курск сувости кемасига нима бўлганини сўраган. Бунга Путин табассум билан «У ғарқ бўлди», деб жавоб берган. Ушбу ибора суҳбатнинг энг эсда қоларли қисмига айланган.

Аввалроқ Рим папасининг шахсий шифокори ҳамда Жеймс Бонднинг маъшуқаси ролини ижро этган актриса Таня Робертс вафот этгани ҳақида хабар берилганди.