Rio-de-Janeyro meri Eduardo Payes yozda o‘tkaziladigan karnavalni bekor qilish to‘g‘risida qaror qabul qildi. Bu haqda u Twitter’da ma’lum qildi, deb yozmoqda “RBK”.
Payes karnavalga bo‘lgan qiziqishini hech qachon berkitmasligini va shahar iqtisodiyoti uchun mazkur madaniy tadbirning ahamiyati naqadar kattaligini ta’kidladi. Shunga qaramay, shahar meri “hatto iyul oyida ham tadbir o‘tkazishni o‘ylash befoyda” deb hisoblaydi.
Rio rahbari tadbirni tashkillashtirishga katta tayyorgarlik talab etilishini ta’kidladi. Shuningdek, u karnavalni tashkillashtirishga aloqador bo‘lgan tashkilotlarni birmuncha qo‘llab-quvvatlaydigan hujjatlarni tayyorlash haqida ko‘rsatma berganini aytdi.
Rio-de-Janeyroda karnaval an’anaga ko‘ra besh kun davom etadi. Ginnesning rekordlar kitobi 2004-yilda uni dunyodagi eng katta karnaval deb atagan. Tadbirga bir kunda 2 million kishi qatnashadi.
Braziliya koronavirus yuqtirib olganlar soni bo‘yicha dunyoda 3-o‘rinda turibdi. Braziliya Sog‘liqni saqlash vazirligining ma’lumotlariga ko‘ra, mamlakatda virusga chalinish bo‘yicha 8 697 368 ta holat tasdiqlangan.
Koronavirus pandemiyasi tufayli dunyoda ko‘plab ommaviy tadbirlar, shu jumladan, Jenevadagi avtomobil hamda Londondagi kitob ko‘rgazmasi bekor qilingan.
Dekabr oyida braziliyalik olimlar koronavirusning yangi shtammini Rio-de-Janeyro shtatida aniqlagani hamda ushbu B.1.1.28 mutatsiya mamlakat hududida tarqalishga ulgurgani haqida xabar berilgandi.
Izoh (0)