Rossiyaning “Sputnik V” vaksinasi uchun harorat rejimi o‘zgartirildi — endi uni -18 o‘rniga +8 darajada saqlash mumkin

Rossiya sog‘liqni saqlash vaziri Mixail Murashko koronavirusga qarshi “Sputnik-V” vaksinasining ro‘yxatdan o‘tkazish guvohnomasiga kiritilgan o‘zgartirishlar vazirlik tomonidan ma’qullanganini ma’lum qildi, deb yozadi “RBK”. Endi vaksinani avvalgidek -18 °C emas, 2-8 °C haroratda saqlash mumkin bo‘ladi.

“Ishlab chiqaruvchi suyuq shakldagi dori +2 dan +8 darajagacha haroratda tashish va saqlash sharoitlarida vaksinaning barqarorligini ta’minlashga muvaffaq bo‘ldi, buni ekspertiza tasdiqladi. Ushbu harorat rejimi immunobiologik dorilarni saqlash uchun standart hisoblanadi”, — dedi vazir.

Uning so‘zlariga ko‘ra, modifikatsiyalangan vaksina hozir ishlab chiqarish maydonlarining birida chiqarilmoqda. “Ishlab chiqarish maydonlaridan birida yangi saqlash sharoitlarini talab qiluvchi ‘Sputnik V’ vaksinasini chiqarishning boshlanishi bizga aholi uchun yangi koronavirus infeksiyasiga qarshi ommaviy emlash imkoniyatini oshirish va uning qamrovni kengaytirish imkonini beradi”, — dedi SSV rahbari.

Murashkoning aniqlik kiritishicha, endi “Sputnik V” vaksinasining ikki xil modifikatsiyasi ham qo‘llaniladi: biri 18 daraja sovuq haroratda, ikkinchisi — iliq haroratda saqlanadigan vaksinalar.

+2 dan +8 darajagacha haroratda saqlash talab etiladigan “Sputnik V” vaksinasi hozircha 6 ta ishlab chiqarish maydonining bittasida chiqariladi, qolgan maydonlar muzlatilgan vaksinani chiqarishda davom etadi.

Meduza ishlab chiquvchilarga yaqin manbasiga tayanib yozishicha, +8 darajada vaksina avvalgidek uzoq vaqt saqlanmaydi — endi uni saqlash muddati olti oy o‘rniga ikki oy bo‘ladi. “Bu xuddi o‘sha dori, xuddi o‘sha tarkib, shunchaki saqlash bo‘yicha harorat rejimi kengaytirilgan”, — dedi nashr hamsuhbati.

“Gam-Kovid-Vak” (“Sputnik V”ning rasmiy nomi)ning ro‘yxatdan o‘tkazish guvohnomasi bungacha dorining -18 darajada saqlanishini talab qilar, haroratning hatto qisqa muddatga oshirilishiga yo‘l qo‘ymasdi. Bu vaksinani uzoq hududlarga yetkazish va u yerlarda dorini saqlashda qiyinchilik tug‘dirayotgan edi.

Vaksinaning quritilgan shakli “Gam-Kovid-Vak-Lio” uchun ham yana bir ro‘yxatdan o‘tkazish guvohnomasi berilgan. Bu shakl muzlatilgani bilan birgalikda I va II bosqich sinovlarda (ikkita bosqich birlashgan tarzda o‘tgan) immunogenlik (immunitetning vaksinatsiyaga reaksiyasi) bo‘yicha deyarli bir xil natija ko‘rsatgan. Ammo minglab ko‘ngillilar bilan o‘tkazilgan keng ko‘lamli tadqiqotda faqat muzlatilgan shakl — “Gam-Kovid-Vak” qo‘llanilgan.