Twitter ijtimoiy tarmog‘i Xitoyning AQShdagi elchixonasi rasmiy akkauntining egalari uchun ushbu akkauntdan foydalanishni chekladi, deb yozadi Meduza.
Bunga Xitoy hukumatining siyosati sharofati bilan Shinjon-Uyg‘ur muxtor tumanidagi ayollar “bola ishlab chiqarish mashinalari” bo‘lishdan to‘xtagani haqidagi tvit sababchi bo‘ldi. Postga Xitoy Kommunistik partiyasining ingliz tilidagi rasmiy gazetasi — China Daily’da e’lon qilingan tadqiqotga havola ilova qilingan.
Tvit 7-yanvar kuni yozilgan. Bir kun o‘tib Twitter uni bekitib qo‘ydi, o‘rniga “Bu tvitni boshqa ko‘rib bo‘lmaydi” degan belgi qoldirdi. Twitter vakili Bloomberg’ga ma’lum qilishicha, ushbu tvit ijtimoiy tarmoqning degumanizatsiya (insoniylikdan chiqarish)ga qarshi siyosatiga ziddir. U odamlar guruhini diniy e’tiqodi, irqi va millati bo‘yicha insoniylikdan chiqarishni taqiqlaydi.
Twitter ijtimoiy tarmoq qoidalariga zid bo‘lgan tvitlarni berkitish bilan birgalikda, akkauntning egasidan uni qayta tiklash uchun tvitni qo‘lda o‘chirishni talab qiladi. Xitoyning AQShdagi elchixonasi tvitni o‘chirmadi, shu sababli Twitter hozircha muassasa uchun akkauntga kirish imkoniyatini qayta tiklagani yo‘q. U 9-yanvardan buyon yangilanmagan.
AQShdagi Xitoy elchixonasi izohlardan bosh tortdi. Xitoy davlat OAVlari esa avvalroq Twitter’ning qarorini “ikkiyuzlamachilik” deb atagandi, deb yozadi Bloomberg.
Xitoy ko‘p marotaba Shinjon-Uyg‘ur muxtor tumanidagi uyg‘urlar hamda boshqa etnik va diniy ozchiliklar huquqlarini ommaviy buzishda ayblangan. Bunday ayblovlar orasida sterilizatsiya va abortlarga majburlash ham bor. Bir necha kun avval AQSh dunyoda birinchi bo‘lib Xitoy hukumatining uyg‘urlarga nisbatan munosabatini genotsid deb atadi.
Xitoy barcha ayblovlarni rad etmoqda. AQSh hukumatining genotsid haqidagi bayonotidan keyin Pekin 28 nafar amerikalik mansabdorga nisbatan sanksiyalar kiritib, ularni “Xitoyga nisbatan yanglish fikr va nafratda” aybladi. Sanksiya ro‘yxatiga genotsid haqida bayonot bergan AQSh sobiq davlat kotibi Mayk Pompeo ham kirdi.
Mavzuga doir:
- Xitoy Tramp ma’muriyati vakillariga qarshi sanksiyalar e’lon qildi. Oq uy ularni “samarasiz” deb atadi
- AQSh dunyoda birinchi bo‘lib Xitoyni uyg‘urlarga nisbatan genotsidda aybladi. Konslagerlardagi millionlab odamlar, qiynoqlar va majburiy sterilizatsiya sababli
- AQSh uyg‘urlarga qilinayotgan zug‘umlar sabab Shinjondan paxta importini cheklab qo‘ydi
- Xitoy hukumati maxsus lagerlarda qayta tayyorlangan musulmonlarning baxtli ekanligini aytmoqda
- Xorijga chiqish pasportini rasmiylashtirgan, xorij saytiga kirgan, ijtimoiy tarmoqlarda “chalg‘ituvchi aloqalarga ega”. Uyg‘urlar nima uchun Xitoy lagerlariga jo‘natilmoqda
Izoh (0)