Fransiya markaziy banki rahbari Fransua Villerua de Galo 2021-yil boshida o‘tkazilgan an’anaviy matbuot anjumanida “Breksit” allaqachon Fransiya iqtisodiyotiga ba’zi ingliz kompaniyalari va ularning aktivlarini o‘ziga og‘dirib olishga yordam berganini aytdi, deya xabar bermoqda “Kommersant”.
Markaziy bank rahbarining so‘zlariga ko‘ra, 2021-yilda bu jarayon yanada kuchayadi. “1-yanvardan beri Buyuk Britaniya moliyaviy pasportini yo‘qotdi. Biz bunga faol tarzda tayyorlangandik va bugun, xayriyatki, moliyaviy faoliyatimizning uzluksizligi ta’minlanmoqda”,— dedi janob de Galo.
Pandemiyaga qaramay, allaqachon deyarli 2,5 ming ish o‘rni Buyuk Britaniyadan Fransiyaga o‘tkazilgan. 2020-yil oxiriga qadar kamida 170 milliard yevrolik aktivlarni boshqaradigan 50 ga yaqin ingliz tashkilotlari Fransiyaga ko‘chib o‘tdi. 2021-yil bunday transferlar tezlashishi kutilmoqda.
Ma’lumot uchun, “Breksit” — Buyuk Britaniyaning Yevropa ittifoqidan chiqib ketish jarayoni. 2019-yilning dekabrida “Breksit”ning tezroq amalga oshishi tarafdori bo‘lgan bosh vazir Boris Jonsonning Konservativ partiyasi parlament saylovlarida g‘alaba qozongan. Britaniya parlamentining ikkala palatasi ham 2020-yil 31-yanvar kuni mamlakatning Yevropa Ittifoqidan chiqishi to‘g‘risidagi qonun loyihasini ma’qullagan hamda 1-fevralga o‘tar kechasi 47 yillik a’zolikdan so‘ng Buyuk Britaniya Yevropa Ittifoqini tark etgan.
Undan avval Britaniya “Breksit” tufayli haftasiga 600 million funt sterling yo‘qotayotgani xabar qilingan.
Izoh (0)