Namanganda qo‘shni mamlakatdan respublika hududiga olib kiritilgan umumiy qiymati 96 million so‘m bo‘lgan tamaki mahsulotlarining savdosiga chek qo‘yildi. Bu haqda Davlat bojxona qo‘mitasi matbuot xizmati xabar berdi.
Namangan viloyati Chortoq tumanida viloyat bojxona boshqarmasi Kontrabandaga qarshi kurashish va bojxona auditi bo‘limi xodimlari tomonidan o‘tkazilgan tezkor tadbir davomida chegara oldi hududida harakatlanayotgan fuqaro J.X. boshqaruvidagi Cobalt mashinasi belgilangan tartibda ko‘zdan kechirilgan.
Natijada mashina salonida xorijda ishlab chiqarilgan umumiy qiymati 15 million so‘mlik 1000 quti tamaki mahsulotlari borligi aniqlangan.
Tezkor tadbir davom ettirilib, voqea joyida harakatlanayotgan Damas avtomobili ham to‘xtatildi va belgilangan tartibda ko‘zdan kechirilgan. Bu mashinada ham qo‘shni mamlakatdan noqonuniy olib kirilgan qiymati 81 million so‘mlik 5370 quti tamaki mahsulotlari borligi aniqlangan.
Avvalroq Surxondaryoda 20 milliard so‘mlik tamaki mahsulotlarining noqonuniy olib kirilishiga chek qo‘yilgani to‘g‘risida xabar berilgandi.
Izoh (0)