Andijon viloyatida 16 nafar yosh yigit-qiz 10 kun muddatga shahar va tuman hokimlari, hokim o‘rinbosarlari lavozimini egalladi. Shuningdek, 48 nafar yosh esa uyushmagan yoshlar bilan ishlash bo‘yicha sektor rahbarlariga uzoq muddatga biriktirildi. Bu haqda viloyat hokimi Shuhrat Abdurahmonovning yoshlar yetakchilari bilan uchrashuvida ma’lum qilindi, deya xabar berdi “Daryo” muxbiri.
Ta’kidlanishicha, 20-yanvar, chorshanba kuni Shuhrat Abdurahmonov raisligida videoselektor tarzida umumta’lim maktablari hamda oliy ta’lim muassasalarida faoliyat olib borayotgan yoshlar yetakchilari bilan uchrashuv o‘tkazilgan. Unda yoshlar yetakchilari faoliyatining samaradorligini oshirish, o‘quvchi-yoshlar hamda uyushmagan yoshlar bilan ishlash tizimini samarali yo‘lga qo‘yish masalalariga alohida e’tibor qaratilgan. Yig‘ilishda “yoshlar daftari”ga kiritilgan uyushmagan yoshlar bilan “Tengdosh tengdoshga” tamoyili asosida ishlash masalasi muhokama qilingan.
Shundan so‘ng viloyat rahbari 2021-yil 20-yanvardan 30-yanvarga qadar “Andijonda yoshlar o‘n kunligi” loyihasi doirasida 16 nafar yosh 10 kun muddatga shahar va tuman hokimlari o‘rnini egallaganini ma’lum qilgan. Shuningdek, 48 nafar yosh sektor rahbarlariga biriktirilgan.
Yoshlar ishlari agentligi viloyat boshqarmasi boshlig‘i Oybek Yo‘ldoshevning ma’lum qilishicha, lavozimlarga tayinlangan yoshlarning asosiy e’tibori “yoshlar daftari”ga kiritilgan uyushmagan yoshlar bilan ishlashga qaratiladi.
“Ushbu loyiha o‘tgan yilda ham tashkil etilib, yaxshi samara bergan edi. Joriy yilda loyihaga yil nomiga qarab o‘zgartirish kiritildi. Ya’ni, yosh hokimlar asosiy e’tiborni ‘Tengdosh tengdoshga’ tamoyili asosda uyushmagan yoshlar bilan ishlashga qaratadi. Ular mahallalarda uyushmagan yoshlar bilan uchrashuvlar o‘tkazib, ularning muammo va takliflarini o‘rganishadi hamda joyida hal etishga harakat qilishadi. Yosh hokimlar yakunda rahbarlik lavozimlaridagi faoliyati yuzasidan hisobot tayyorlaydi va taklif beradi. Qolgan 48 nafar yosh esa bir oydan bir yilga qadar bo‘lgan muddat davomida sektor rahbarlari bilan birgalikda yoshlar masalalari bilan shug‘ullanishadi”,— deydi Oybek Yo‘ldoshev.
Eslatib o‘tamiz, 2020-yil 17-yanvar kuni Qashqadaryo hokimi Zoir Mirzayev o‘rinbosarlari va 15 nafar hudud hokimi tibbiy ko‘rikdan o‘tish hamda davolanish maqsadida Toshkent shahriga jo‘nab ketgandi. Ularning o‘rnini esa yoshlar egallab, 10 kun muddatga hududni boshqarishga kirishgandi.
Mavzuga doir: Andijonda hokimlar 10 kunga “yashartirildi”
Izoh (0)