Тошкент шаҳрида мавжуд муаммоларни бартараф этиш учун ҳар бир маҳалла фуқаролар йиғинига 50 миллион сўмдан маблағ ажратилади. Бу ҳақда 19 январь куни бўлиб ўтган Халқ депутатлари Тошкент шаҳар кенгашининг ўттиз биринчи сессиясида Тошкент шаҳар ҳокими Жаҳонгир Ортиқхўжаев айтиб ўтди.
Сессия ишида маълум қилинишича, маҳаллани намунавий ҳолатга келтириш каби йўналишларида Тошкент шаҳрида энг яхши маҳалла раисларини танлаб олиш учун низом ишлаб чиқилган. Низомга асосан намунавий деб топилган 50 та энг яхши маҳалла раисининг ҳар бирига ҳомийлар томонидан ажратилаётган 50 та Spark автомобили Ўзбекистон Республикасининг Мустақиллик байрами арафасида топширилади. Ғолиблар 30 август куни эълон қилинади.
Жаҳонгир Ортиқхўжаевнинг айтиб ўтишича, мавжуд муаммоларни бартараф этиш учун пойтахтдаги 519 та маҳалла фуқаролар йиғинларининг ҳар бирига 50 миллион сўмдан – қарийб 26 миллиард сўм ажратилади.
«Халққа фойдаси тегган, фуқароларнинг яшаш сифатини озгина бўлса-да ўзгартиришга ҳиссасини қўшган, фуқароларнинг дарди билан яшаган, маҳалласини энг намунали қилган маҳалла раисларининг ўнтадан биттасига аҳолининг розилиги билан Spark автомобили тақдим этилади», – деди пойтахт ҳокими.
Унинг қўшимча қилишича, ютуқ учун берилган автомобиль ишчи машинаси эмас.
«Хоҳласа ҳайдайди, хоҳласа сотиб юборади, хоҳласа невараларига беради. Бу вақтинчалик машина эмас – бу совға. Лекин бунинг учун жуда катта фаол хизмат қилиш керак бўлади. Менимча, маҳаллага бироз жон киради, маҳаллада бироз қон айланади. Маҳалла фуқаролар раислари ҳам бунга бефарқ бўлмайди. Ўзининг фаол хизматларини қилишади, деб ўйлайман», – деди Жаҳонгир Ортиқхўжаев.
Аввалроқ Жаҳонгир Ортиқхўжаев депутатлар 2020 йил бюджетдан ортиб қолган пулларни талабалар ётоқхонаси учун сарфлашни актуал масала деб ҳисобламаганликларини айтиб ўтган эди.
Изоҳ (0)