YouTube’da Street Speed 717 niki ostida tanilgan bloger yangi Ram TRX pikapi yordamida kanal ustidan sakrab o‘tishga qaror qildi, deb yozadi CARakoom.
G‘oya shunchaki paydo bo‘lmagan, u suv ustidan sakrab o‘tishga Ford F-150 Raptor’ining shu kabi muvaffaqiyatli urinishidan so‘ng qaror qilgan. Reja bo‘yicha Bilstein faol “podveska”si va 35 dyuymli Goodyear g‘ildiraklariga ega Ram TRX tryukni bemalol bajarishi kerak edi. Biroq barchasi kutilganidek bo‘lmagan.
Pikap yetarli darajada yuqoriga ko‘tarilgan, biroq yerga qo‘nishda ayrim muammolarga duch kelgan: dastlabki zarba og‘irligi old yo‘lovchi g‘ildiraklariga to‘g‘ri kelgan. Natijada old bamper yaxshigina ezilgan. Bundan tashqari, orqa oyna ham sinib ketgan, hatto kuzovning plastik shovqin so‘ndirgichlariga shikast yetgan.
Shunga qaramay, bu kabi “qo‘nish”dan so‘ng ham Ram TRX mustaqil o‘zi ustaxonaga harakatlanib ketgan.
2020-yil oxirida Amerikaning Ram Trucks kompaniyasi yangi Ram TRX 2021 seriyali pikapini ishlab chiqarishni boshlagan edi. Birinchi partiya hozirda konveyerdan chiqib bo‘lgan. Avvalroq pikaplardan biri konveyerdan chiqishga ulgurmay, pachaqlangani to‘g‘risida xabar berilgandi.
Eslatib o‘tamiz, Ram Trucks o‘tgan yilning avgustida taqdim etilgandi. U Ford Raptor’ga raqobatchi hisoblanadi. Mashinaga 702 ot kuchi va 880 Nm aylanuvchi momentni taqdim etishga qodir 6,2 litrli V8 Dodge Hellcat dvigateli o‘rnatilgan. “Yirtqich” soatiga 100 kilometr tezlikka 4,5 soniyada erishishi mumkin. Maksimal tezligi — 190 km/soat.
Izoh (0)