Toyota kompaniyasi AQShning Toza havo to‘g‘risidagi qonunini buzgani uchun mamlakat budjetiga 180 million dollar jarima to‘laydi, deb xabar beradi Motor.
Nyu-York Janubiy okrugi prokurori Yaponiyaning Toyota korporatsiyasini Toza havo to‘g‘risidagi qonun bo‘yicha zararli gazlar bilan bog‘liq nuqsonlarga oid hisobotlar talabini tizimli ravishda buzganlikda ayblagan. Yapon avtomobil ishlab chiqaruvchisi 2021-yil 31-martga qadar AQShga 180 million dollar jarima to‘laydi. Bu Toyota havoga chiqadigan zararli gazlar to‘g‘risidagi natijalarni soxtalashtirganini bildirmaydi — gap byurokratik rasmiyatchilik haqida ketmoqda. Yaponlar buni “qog‘ozli” jarayonlarning ayrim qismini bajarishdagi tushunmovchilik deb atagan.
Toza havo to‘g‘risidagi qonunga ko‘ra, avtomobil ishlab chiqaruvchi nuqsonlar to‘g‘risidagi hisobotni (EDIR) bir modelning yil davomida kamida 25 ta avtomobili havoga chiqaradigan gazlar sabab ishdan chiqqan holda berishi kerak. Marka muammoni bartaraf etgach, u ixtiyoriy chaqiruv (VERR) bo‘yicha hisobot berishi lozim. AQSh Atrof-muhitni qo‘riqlash boshqarmasining (EPA) ma’lum qilishicha, Toyota 2005-yildan 2015-yilga qadar 78 ta EDIR, 20 ta VERR va 200 dan ortiq chorak hisobotlarini taqdim etmagan.
Eslatib o‘tamiz, 2020-yilning oktabrida Angliya va Uelsdan Fiat-Chrysler Automobiles (FCA) dizel dvigatellari o‘rnatilgan 500 mingga yaqin avtomobil chaqirib olinishi mumkinligi to‘g‘risida xabar berilgandi. Bunga atrof-muhitga chiqariladigan zararli gazlar ko‘rsatkichi manipulyatsiya qilingan bo‘lishi ehtimolligi sabab bo‘lgan.
Izoh (0)