Samarqandda xotin-qizlarni ularning uyatli va yalang‘och suratlarini tarqatib yuborish bilan qo‘rqitgan shaxslar qo‘lga olindi

Samarqandda fuqarolarning uyatli rasmlarini ijtimoiy tarmoqlarda tarqatish bilan qo‘rqitib, ulardan pul talab qilgan shaxslar qo‘lga olindi. Bu haqda “Daryo”ga viloyati IIB axborot xizmati xabar berdi.

Ta’kidlanishicha, 2021-yilning 16-yanvar kuni Urgut tumani bo‘yicha IIO FMBga tumanning “Quyi Algar” mahallasida yashovchi fuqaro murojaat qilib, Surxondaryo viloyatida yashovchi X.U. ismli shaxs unga qo‘ng‘iroq qilib, qaynsinglisining o‘zi bilan tushgan uyatli rasmi borligini aytgan. Ushbu fotosuratlarni ijtimoiy tarmoqlarda tarqatmaslik evaziga 800 dollar talab qilayotganligini bildirgan.

2020-yilning 17-yanvar kuni Urgut tumani bo‘yicha IIO FMB JQB xodimlari tomonidan Samarqand shahridagi Samarqand—Toshkent avtobekati oldida o‘tkazilgan tezkor-tadbir davomida X.U. ariza muallifidan qonunga xilof ravishda 500 dollar va 1 million 600 ming so‘m pulni olib, uyatsiz fotosuratlari mavjud bo‘lgan telefon apparatini X.ga bergan vaqtida jinoyat ustida qo‘lga olinib, hujjatlashtirib olingan.

Shuningdek, 2021-yilning 16-yanvar kuni Jomboy tumanida yashovchi “E” ismli fuqaro Samarqand shahri bo‘yicha IIO FMBga ariza bilan murojaat qilib, Samarqand shahrining Sug‘diyona maskanida yashovchi tanishi M.F. unga telefon qilib, uning yalang‘och tushgan rasmlari telefon apparatida borligini 2000 dollar bermasa, ushbu rasmlarni internet tarmog‘iga joylashtirishni aytib, qo‘rqitgan.

2021-yil 16-yanvar kuni Samarqand shahri bo‘yicha IIO FMB JQB xodimlari tomonidan Samarqand shahridagi “Marhabo” mahallasida o‘tkazilgan tezkor tadbirda, fuqaro M.F. ariza muallifidan tadbirda ishlatilgan 1 million 45 ming so‘mga teng bo‘lgan 1000 dollarni olayotgan vaqtida ushlanib, hujjatlashtirib olingan.

Har ikkala holat yuzasidan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilib, tergov harakatlari olib borilmoqda.