Самарқандда фуқароларнинг уятли расмларини ижтимоий тармоқларда тарқатиш билан қўрқитиб, улардан пул талаб қилган шахслар қўлга олинди. Бу ҳақда «Дарё»га вилояти ИИБ ахборот хизмати хабар берди.
Таъкидланишича, 2021 йилнинг 16 январь куни Ургут тумани бўйича ИИО ФМБга туманнинг «Қуйи Алгар» маҳалласида яшовчи фуқаро мурожаат қилиб, Сурхондарё вилоятида яшовчи Х.У. исмли шахс унга қўнғироқ қилиб, қайнсинглисининг ўзи билан тушган уятли расми борлигини айтган. Ушбу фотосуратларни ижтимоий тармоқларда тарқатмаслик эвазига 800 доллар талаб қилаётганлигини билдирган.
2020 йилнинг 17 январь куни Ургут тумани бўйича ИИО ФМБ ЖҚБ ходимлари томонидан Самарқанд шаҳридаги Самарқанд—Тошкент автобекати олдида ўтказилган тезкор-тадбир давомида Х.У. ариза муаллифидан қонунга хилоф равишда 500 доллар ва 1 миллион 600 минг сўм пулни олиб, уятсиз фотосуратлари мавжуд бўлган телефон аппаратини Х.га берган вақтида жиноят устида қўлга олиниб, ҳужжатлаштириб олинган.
Шунингдек, 2021 йилнинг 16 январь куни Жомбой туманида яшовчи «Э» исмли фуқаро Самарқанд шаҳри бўйича ИИО ФМБга ариза билан мурожаат қилиб, Самарқанд шаҳрининг Суғдиёна масканида яшовчи таниши М.Ф. унга телефон қилиб, унинг яланғоч тушган расмлари телефон аппаратида борлигини 2000 доллар бермаса, ушбу расмларни интернет тармоғига жойлаштиришни айтиб, қўрқитган.
2021 йил 16 январь куни Самарқанд шаҳри бўйича ИИО ФМБ ЖҚБ ходимлари томонидан Самарқанд шаҳридаги «Марҳабо» маҳалласида ўтказилган тезкор тадбирда, фуқаро М.Ф. ариза муаллифидан тадбирда ишлатилган 1 миллион 45 минг сўмга тенг бўлган 1000 долларни олаётган вақтида ушланиб, ҳужжатлаштириб олинган.
Ҳар иккала ҳолат юзасидан Жиноят кодексининг 165-моддаси 1-қисми (товламачилик) билан жиноят иши қўзғатилиб, тергов ҳаракатлари олиб борилмоқда.
Мавзуга доир:
Изоҳ (0)