Namanganda fuqaroning o‘zga bilan janjallashgani aks etgan videosini internetda tarqatmaslik evaziga undan 100 dollar talab qilgan shaxs ushlandi
Namangan viloyatida fuqaroning sir saqlanishi kerak bo‘lgan ma’lumotini internetda tarqatib yuborish bilan qo‘rqitib, undan 100 AQSh dollari talab qilgan shaxs ushlandi, deya xabar bermoqda Tergov departamenti.
Ma’lum qilinishicha, 2020-yilning 28-sentabr kunidan 29-sentabr kuniga o‘tar kechasi, Namangan viloyati Uchqo‘rg‘on shahrida istiqomat qiluvchi 20 yoshli A.S. Uchqo‘rg‘on shahri “Ko‘prikboshi” MFYda istiqomat qiluvchi 21 yoshli Sh.A.ga qo‘ng‘iroq qilib, unga 2017-yilda Tohir ismli shaxs bilan janjallashgan holati tasvirga tushirilgan videoni Telegram ijtimoiy tarmog‘idagi guruhlarda tarqatib yuborishini aytgan.
Shundan so‘ng A.S. tasvirni fuqaro Sh.A.ning telefoniga yuborib, uning uchun sir saqlanishi lozim bo‘lgan ma’lumotlarni oshkor qilish bilan qo‘rqitib, ushbu videoni tarqatib yubormaslik evaziga Sh.A.dan 100 AQSh dollari miqdoridagi pullarni talab qilgan.
A.S. talab qilgan pullarini olayotgan vaqtida IIB xodimlari tomonidan ushlangan.
Mazkur holat yuzasidan Uchqo‘rg‘on tuman IIB huzuridagi Tergov bo‘linmasi tomonidan Sh.A.ga nisbatan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilgan.
Hozirda tergov harakatlari davom etmoqda.
Avvalroq Namanganda tanishining shaxsiy videosini tarqatmaslik evaziga 100 dollar talab qilgan shaxs, Sergelida 31 yoshli erkakni shaxsiy videolarini tarqatish bilan “shantaj” qilmoqchi bo‘lgan ayol, Buxoroda ayol tanishining shaxsiy fotosuratlarini tarqatish bilan qo‘rqitib, undan 1000 dollar talab qilgan shaxs va Samarqandda 43 yoshli tanishining suratlarini internetga tarqatish bilan qo‘rqitib, 2200 dollar talab qilgan ayol qo‘lga olingani haqida xabar berilgandi.
