AQShning saylangan prezidenti Jo Bayden 20-yanvar, inauguratsiya kuni mamlakatni iqlim bo‘yicha Parij bitimiga qaytarish to‘g‘risida farmon imzolaydi. Bu haqda Oq uy xodimlar apparati rahbari Ron Klaynning xizmat qaydlariga asoslanib CNN xabar bermoqda.
Klayn xizmat qaydlariga ko‘ra, Bayden inauguratsiya kuni o‘ndan ortiq farmonlarni imzolaydi. Ulardan ba’zilari AQShning amaldagi prezidenti Donald Tramp ma’muriyatining buyruqlarini bekor qilishga oid bo‘ladi.
Xususan, 2017-yilda Tramp kiritgan yetti musulmon davlat — Suriya, Eron, Iroq, Liviya, Somali, Sudan va Yaman fuqarolarining AQShga kirishini taqiqlash haqidagi buyruqlar ham bekor qilinadi.
Avvalroq Baydenning AQShni Parij iqlim kelishuviga qaytarmoqchiligi haqida Washington Post’ga tayanib xabar berilgandi.
Ma’lumot uchun, Parijning iqlim shartnomasi 2015-yilda 195 mamlakat, shu jumladan, AQSh tomonidan imzolangan. Biroq 2017-yilda Qo‘shma Shtatlarning ushbu shartnomadan chiqayotgani e’lon qilindi. Bitim majburiyatlari Amerika fuqarolari uchun “og‘ir moliyaviy va iqtisodiy yuk” deb hisoblandi.
AQSh mazkur bitimdan chiqayotganligi to‘g‘risida 2019-yil noyabr oyida Birlashgan Millatlar Tashkilotini xabardor qildi. Jarayon bir yil o‘tib, 4-noyabrda rasman yakunlandi.
Izoh (0)