АҚШнинг сайланган президенти Жо Байден 20 январь, инаугурация куни мамлакатни иқлим бўйича Париж битимига қайтариш тўғрисида фармон имзолайди. Бу ҳақда Оқ уй ходимлар аппарати раҳбари Рон Клайннинг хизмат қайдларига асосланиб CNN хабар бермоқда.
Клайн хизмат қайдларига кўра, Байден инаугурация куни ўндан ортиқ фармонларни имзолайди. Улардан баъзилари АҚШнинг амалдаги президенти Дональд Трамп маъмуриятининг буйруқларини бекор қилишга оид бўлади.
Хусусан, 2017 йилда Трамп киритган етти мусулмон давлат — Сурия, Эрон, Ироқ, Ливия, Сомали, Судан ва Яман фуқароларининг АҚШга киришини тақиқлаш ҳақидаги буйруқлар ҳам бекор қилинади.
Аввалроқ Байденнинг АҚШни Париж иқлим келишувига қайтармоқчилиги ҳақида Washington Post’га таяниб хабар берилганди.
Маълумот учун, Парижнинг иқлим шартномаси 2015 йилда 195 мамлакат, шу жумладан, АҚШ томонидан имзоланган. Бироқ 2017 йилда Қўшма Штатларнинг ушбу шартномадан чиқаётгани эълон қилинди. Битим мажбуриятлари Америка фуқаролари учун «оғир молиявий ва иқтисодий юк» деб ҳисобланди.
АҚШ мазкур битимдан чиқаётганлиги тўғрисида 2019 йил ноябрь ойида Бирлашган Миллатлар Ташкилотини хабардор қилди. Жараён бир йил ўтиб, 4 ноябрда расман якунланди.
Изоҳ (0)