Ozarbayjonda Xitoyning Sinovac Biotech kompaniyasi tomonidan ishlab chiqarilgan CoronaVac vaksinasi bilan aholini ommaviy emlash 18-yanvarda boshlanadi. Hukumat to‘rt million doza vaksinaga buyurtma bergan, deb xabar qildi “Korrespondent.net”.
“Koronavirusga qarshi emlashni 18-yanvardan boshlash to‘g‘risida qaror qabul qilindi”, — dedi mamlakat prezidentining yordamchisi Shahmar Movsumov.
Uning qo‘shimcha qilishicha, ushbu vaksinaning birinchi partiyasi allaqachon mamlakatga olib kelingan.
Ozarbayjon Sog‘liqni saqlash vazirligi vakili Teymur Musayevning so‘zlariga ko‘ra, Xitoydan sotib olingan dozalar dastlab Turkiyaga yetkazib berilgan va yerdagi laboratoriyalarda standartlarga muvofiqligi tekshirilgan. Endi ular qadoqlanib Ozarbayjonga jo‘natiladi.
Vaksina bilan dastlab tibbiyot xodimlari emlanadi. 1-fevralda emlashning ikkinchi bosqichi boshlanadi, bunda 65 yoshdan oshgan fuqarolarga vaksina yuboriladi.
Shuningdek, Ozarbayjonda karantin 1-aprelga qadar uzaytirildi. Shu bilan birga, karantin biroz yumshatildi. Masalan, ayrim hududlarda “icaze.gov.az” portali orqali uydan va turar joydan chiqib ketish uchun olingan SMS-ruxsatnoma tizimi bekor qilinadi.
Bundan tashqari, 25-yanvardan boshlab savdo obyektlari (kafe, restoran va choyxonalardan tashqari), sartaroshxonalar, go‘zallik salonlari va muzeylarning ishlashiga ruxsat berildi. Shaharlararo va tumanlararo aloqa tiklanadi.
So‘nggi ma’lumotlarga ko‘ra, pandemiya boshlanganidan buyon Ozarbayjonda 226 549 kishi koronavirus bilan kasallangan, 213 773 kishi sog‘ayib ketgan va 2983 kishi vafot etgan.
Avvalroq Turkiya hamda Indoneziya aholisini Xitoyning Sinovac Biotech kompaniyasi tomonidan ishlab chiqarilgan vaksina bilan emlashi haqida xabar berilgandi. Bundan tashqari, Rossiyada ham 18-yanvardan aholini ommaviy emlash boshlanadi.
Izoh (0)