Озарбайжонда Хитойнинг Sinovac Biotech компанияси томонидан ишлаб чиқарилган CoronaVac вакцинаси билан аҳолини оммавий эмлаш 18 январда бошланади. Ҳукумат тўрт миллион доза вакцинага буюртма берган, деб хабар қилди «Korrespondent.net».
«Коронавирусга қарши эмлашни 18 январдан бошлаш тўғрисида қарор қабул қилинди», — деди мамлакат президентининг ёрдамчиси Шаҳмар Мовсумов.
Унинг қўшимча қилишича, ушбу вакцинанинг биринчи партияси аллақачон мамлакатга олиб келинган.
Озарбайжон Соғлиқни сақлаш вазирлиги вакили Теймур Мусаевнинг сўзларига кўра, Хитойдан сотиб олинган дозалар дастлаб Туркияга етказиб берилган ва ердаги лабораторияларда стандартларга мувофиқлиги текширилган. Энди улар қадоқланиб Озарбайжонга жўнатилади.
Вакцина билан дастлаб тиббиёт ходимлари эмланади. 1 февралда эмлашнинг иккинчи босқичи бошланади, бунда 65 ёшдан ошган фуқароларга вакцина юборилади.
Шунингдек, Озарбайжонда карантин 1 апрелга қадар узайтирилди. Шу билан бирга, карантин бироз юмшатилди. Масалан, айрим ҳудудларда «icaze.gov.аз» портали орқали уйдан ва турар жойдан чиқиб кетиш учун олинган SMS-рухсатнома тизими бекор қилинади.
Бундан ташқари, 25 январдан бошлаб савдо объектлари (кафе, ресторан ва чойхоналардан ташқари), сартарошхоналар, гўзаллик салонлари ва музейларнинг ишлашига рухсат берилди. Шаҳарлараро ва туманлараро алоқа тикланади.
Сўнгги маълумотларга кўра, пандемия бошланганидан буён Озарбайжонда 226 549 киши коронавирус билан касалланган, 213 773 киши соғайиб кетган ва 2983 киши вафот этган.
Аввалроқ Туркия ҳамда Индонезия аҳолисини Хитойнинг Sinovac Biotech компанияси томонидан ишлаб чиқарилган вакцина билан эмлаши ҳақида хабар берилганди. Бундан ташқари, Россияда ҳам 18 январдан аҳолини оммавий эмлаш бошланади.
Изоҳ (0)