Бухоро вилоятининг Жондор туманига кириш дарвозасида узоқ йиллардан буён туман аҳолисининг фахрига айланган тарихий шахс — Маҳмуд Торобий ҳайкали 2018 йил сабабсиз олиб ташлангани турли шов-шувларга сабаб бўлганди. Одамларнинг эътирози боис кейинчалик воқеага изоҳ берилиб, туманда кенг кўламли бунёдкорлик ишлари амалга оширилаётгани сабаб ҳайкал вақтинча олиб қўйилгани айтилганди.
Жондор туман ҳокимлиги ахборот хизмати раҳбари Суръат Шомуродовнинг «Дарё»га билдиришича, 2021 йилнинг 12 январь куни Маҳмуд Торобий ҳайкали қайта ўрнатилган.
Таъкидланишича, туман марказида қарийб 5 гектар ҳудудни эгаллаган хиёбон узоқ йиллар давомида қаровсиз қолдирилган. 2019 йил бу ҳолат Бухоронинг ўша пайтдаги раҳбари, марҳум Ўктам Барноев танқидига учраган. Ва шу сабаб хиёбонда таъмирлаш ишлари бошлаб юборилган. Уч миллиард сўм сарфланган хиёбон 2020 йил замонавий кўринишга келган. Шундан сўнг тарих шахс сифатида гавдаланган Маҳмуд Торобий ҳайкалини мазкур хиёбонда ўрнатиш таклифи берилган.
«Тарихий манбаларда ёзилишича, 1238 йилда шу яқин-атрофдаги қишлоқлар аҳолиси Маҳмуд Торобий бошчилигида мўғул босқинчиларига қарши курашган. Бироқ кучлар тенг бўлмаган жангда озодлик курашчилари мағлуб бўлган. Ушбу ҳайкални шогирдларимиз билан биргаликда она диёримизнинг ҳақиқий қаҳрамони қиёфасида тасвирлашга ҳаракат қилдик. Ҳайкалнинг туман марказий хиёбонида ўрнатилгани жондорликлар томонидан хурсандчилик билан қаршиланди», — дейди ҳайкалтарош Қурбон Норхўрозов.
Қайд этилишича, айни кунда туман марказидаги хиёбонга Маҳмуд Торобий номидаги ватанпарварлик боғи дея ном берилган.
Изоҳ (0)