O‘zbekiston Ichki ishlar vazirligining 2012-yilda ishdan bo‘shatilgan sobiq xodimasi lavozimiga qayta tayinlandi. Bu haqda “Daryo”ga Ombudsman matbuot xizmati xabar qildi.
Samarqand viloyati Ichki ishlar boshqarmasi va uning quyi tizimlarida 2000−2012-yilgacha turli lavozimlarda faoliyat yuritgan Xurshida Jalilova 2012-yilga kelib, O‘zbekiston fuqaroligiga mansub emasligi vaji bilan ishdan bo‘shatilgan.
Ma’lum qilinishicha, u 2020-yilning avgustida Oliy Majlisning Inson huquqlari bo‘yicha vakili (Ombudsman)ga murojaat qilib, nohaq ishdan bo‘shatilganini bildirgan.
O‘rganishlar natijasida Jalilova 8 yil mobaynida ishga tiklanish bo‘yicha ko‘plab davlat idoralariga qayta-qayta murojaat qilgani va oxiri uning ishi Oliy sudda ko‘rib chiqilgani aniqlangan.
“Uzoq urinishlar natijasida 2020-yilning mart oyida Oliy sud fuqarolik ishlari bo‘yicha sudlov hay’atining ajrimiga muvofiq, Samarqand viloyat Ichki ishlar boshqarmasi tomonidan o‘tkazilgan xizmat tekshiruvi g‘ayriqonuniy deb topilib, X.Jalilovani Samarqand viloyat Ichki ishlar boshqarmasi tergov bo‘limi katta tergovchisi lavozimiga tiklanishi belgilandi”, — deyiladi xabarda.
Oliy sud qaroriga qaramasdan, Jalilova ishga tiklanmaydi. Shundan so‘ng u Ombudsmanga murojaat qiladi.
Vakil tomonidan o‘tkazilgan o‘rganishlar davomida Oliy sud qarori da’vogarning Qirg‘izistonda fuqaroligi bor yoki yo‘qligi aniqlanayotgani vaji bilan ijro qilinmagani aniqlangan.
Ombudsman matbuot xizmatining ma’lum qilishicha, masalani hal etish maqsadida Oliy Majlisning Inson huquqlari bo‘yicha vakili Qirg‘iziston Ombudsmaniga murojaat qilib, X.Jalilovaning fuqaroligiga aniqlik kiritdi. Shundan so‘ng to‘plangan ma’lumotlar asosida ishga tiklash bo‘yicha vakil xulosasi ichki ishlar vaziriga yuborildi.
Ichki ishlar vazirligining 2021-yil 8-yanvardagi javob xatiga muvofiq, Xurshida Jalilova bor maxsus unvoni bilan IIV kadrlar safiga qo‘shilib, oradagi uzilish davrini xizmat muddatiga qo‘shgan holda xizmatga tiklangan.
Mavzuga doir:
- Qashqadaryolik tez yordam haydovchisi nohaq ishdan bo‘shatilganidan shikoyat qilgan edi. Sud unga nisbatan qonuniy yo‘l tutilganligini tasdiqladi
- “Shaftoli o‘g‘irligi”da ayblanib, 7 yilga qamalgan samarqandlik talabaning onasi Prezidentga murojaat qildi. U o‘g‘li nohaq qamalganini aytmoqda
- “Murojaatlarning 90 foizi qamoqdan yo‘llanadi” — Ombudsman qiynoqlar haqida
Izoh (0)