Мурожаат билан келган фуқароларга «Столба йиқилса, токсиз ўтиринг» деган Сайхунобод электр таъминоти корхонаси раҳбарига нисбатан текширув тайинланди

Сирдарё вилоятининг Сайхунобод тумани электр таъминоти корхонаси раҳбарига нисбатан хизмат текшируви ўтказилиши белгиланди.

Ижтимоий тармоқларда 12 январь, сешанба куни Сайхунобод туман электр таъминоти корхонаси раҳбари билан боғлиқ видеолавҳа тарқалди. Видеода Сайхунобод туман электр таъминоти корхонаси раҳбари ҳузурига келган фуқароларга «столба қўйиб бера олмаслиги»ни, фуқаролардан бирининг «столба йиқилиб одам ўлса, нима бўлади?» деган гапига жавобан «столба йиқилса, токсиз ўтиринг» дегани акс этган.

«Сирдарё ҳудудий электр тармоқлари корхонаси» матбуот хизмати ушбу видео юзасидан расмий муносабат билдириб, Сайхунобод туман электр таъминоти корхонаси раҳбари Ш.Жўраевга нисбатан хизмат текшируви ўтказилиши белгиланганини маълум қилди.  «Хизмат текшируви натижалари юзасидан батафсил маълумот берилишини маълум қиламиз», — дейилади хабарда.

Шунингдек, ижтимоий тармоқларда мазкур раҳбарнинг Ўзбекистонда коронавирус тарқалишининг олдини олиш бўйича Республика махсус комиссияси томонидан карантин даврида белгиланган маска режимига риоя қилмай, белгиланган қоидаларни бузганлиги тўғрисида ҳам қўшимча фикрлар тарқалмоқда.

Аввалроқ «Хоразм ҳудудий электр тармоқлари корхонаси» раҳбари пора билан қўлга олингани ҳақида хабар берилган эди.