Туркияда ўзбекистонлик журналист Абдукарим Мирзаев озодликка чиқарилди. Бу ҳақда 12 январь куни журналистнинг Telegram-каналида маълум қилинди.
Туркиянинг Кастамону университети Коммуникациялар факультети журналистика бўлими магистранти Абдукарим Мирзаев 11 декабрь куни турк полицияси томонидан қўлга олинганди.
Шундан сўнг Ўзбекистон Бош прокуратураси бу ишда расмий Тошкентнинг алоқаси йўқлигини маълум қилган.
Уни ҳуқуқий жиҳатдан ҳимоя қилиш учун ёлланган адвокат вазиятни ўргангач кимдир Абдукарим Мирзаевга тегишли рақам орқали шубҳали шахслар билан мулоқотда бўлгани ҳақида хабар бергани, ушбу маълумот ортидан журналист кузатилиб, сўнгра қўлга олинганини аниқлаган.
Маълум қилинишича, 10 декабрдан 11 декабрга ўтар кечаси ҳарбий либосдаги тўрт киши, шунингдек, фуқаро кийимидаги шахслар Абдукарим Мирзаевнинг уйига келиб, тинтув ўтказган. Сўнг улар ҳужжатларни расмийлаштириб, журналистни олиб кетган.
Журналистга нисбатан гумонлар ўз тасдиғини топмаган. Шунга қарамай, у бир ой давомида депортация бўлинмасида қолишига тўғри келди. Бундан аввал Мирзаевнинг депортация қилинмаслиги айтилган.
Аввалроқ Абдукарим Мирзаев билан алоқада бўлган «шубҳали шахслар»га нисбатан гумонлар ҳам тасдиқланмагани, бу эса Абдукарим Мирзаевни ҳам қўйиб юборилишига олиб келиши мумкинлиги маълум қилинганди.
Изоҳ (0)