Xorazm viloyatining Xiva shahri Islomxo‘ja ko‘chasida joylashgan xonadonlarning birida 8-yanvar kuni soat 3:41 da gaz portladi. Bu haqda Favqulodda vaziyatlar vazirligi matbuot xizmati xabar bermoqda.

Qayd etishlaricha, “uyda sizib chiqqan tabiiy gaz va havo aralashmasi natijasida chaqnash sodir bo‘lib”, yashash uyining devorlari va tomi qulagan hamda uyning 70 kvadrat metr maydonida tom bostirmasida yong‘in sodir bo‘lgan.

Voqea joyida olib borilgan qidiruv ishlari natijasida soat taxminan 4:50 da xonadon egasining qizi (2005-yilda tug‘ilgan) jasadi bino uyumlari orasidan olib chiqilgan. Yong‘inda uy egasi Sh.E.ning yuzi, qo‘llari 22 foiz termik kuyib, shifoxonaga yotqizilgan.

“Tabiiy gazdan foydalanish qoidalarining buzilishi chaqnashning asosiy sababi deb taxmin qilinmoqda”, — deya qo‘shimcha qilingan FVV axborotida. Qayd etishlaricha, Xorazm viloyati hokimi Farhod Ermanov, IIB, FVB, SSB va boshqa tegishli idoralar vakillari voqea joyida bo‘lib turibdi.

Qayd etish joiz, bu 2020—2021-yilgi kuz-qish mavsumida O‘zbekistonda gaz portlashi oqibatida uylarning vayron bo‘lib, odamlar qurbon bo‘lishi bilan bog‘liq dastlabki holat emas. Avvalroq, 6-yanvar kuni Qarshi shahrida, 30-noyabr kuni Toshkent viloyatining Yangiyo‘l tumanida, 21-noyabr kuni Qibray tumanida gaz portlashi oqibatida uylar vayron bo‘lgan, har uchala voqea oqibatida ikki nafardan fuqaro (jami olti kishi) vafot etgan edi.

Ma‘lumot uchun, O‘zbekistonda is gazi chaqnashi, is gazidan zaharlanish, havo-gaz aralashmasi chaqnashi bilan bog‘liq holatlar 2020-yilda 2019-yilga nisbatan 22 foizga ko‘paygan. Prezident Shavkat Mirziyoyev “is gazi va chaqnashlar bilan bog‘liq noxush holatlarning ortib borayotgani har bir rahbarni o‘ylantirishi kerak”ligini alohida ta’kidlagan edi.