Shvarsenegger bolaligida “natsistlar tomonidan aldangan” mast otasi uni do‘pposlagani haqida gapirib berdi. Endi Tramp o‘z tarafdorlarini xuddi shunday aldayotganini aytdi

AQShning Kaliforniya shtati sobiq gubernatori, Respublikachilar partiyasi a’zosi, aktyor Arnold Shvarsenegger videomurojaat qoldirib, unda saylovlardagi mag‘lubiyatini tan olishdan bosh tortayotgan prezident Donald Trampning xatti-harakatlarini tanqid qildi, deb yozadi Meduza.

Nutqi boshida Shvarsenegger Avstriyada Ikkinchi jahon urushi tugaganidan keyin bor-yo‘g‘i ikki yil o‘tib dunyoga kelganini eslatdi va bolaligida atrofidagi kishilar “tarixdagi eng yovuz rejimga aloqadorligi uchun aybdorlik hissi bilan alkogol yordamida kurashishga uringan singan odamlar” bo‘lganini qayd etdi.

“Men bu haqda hech qachon omma oldida gapirmaganman, chunki bular og‘riqli xotiralar. Otam haftasiga bir-ikki marta uyga mast holatda kelardi — baqirardi va onam ikkalamizni urardi. Lekin men buning uchun hamma mas’uliyatni faqat uning bo‘yniga qo‘ymayman, chunki qo‘shnimiz ham, uning qo‘shnisi ham va hokazo — o‘z oilasiga shunday munosabatda bo‘lar edi”, — dedi aktyor.

Shvarseneggerning so‘zlariga ko‘ra, bunday xatti-harakat ruhiy jarohatlar bilan izohlanadi. Jarohatlarning o‘zi esa bu odamlar “yolg‘on va toqat qila olmaslik bilan boshlangan” natsistlar rejimi davrida nimalarni ko‘rgani va nimalar qilgani haqidagi xotiralardan kelib chiqqan.

Endi xuddi shunday yolg‘on yordamida halol saylovlar natijalarini tan olishdan bosh tortayotgan Donald Tramp o‘z tarafdorlarini yig‘moqda: “U yolg‘on yordamida odamlarni ergashtirib, to‘ntarish amalga oshirishga urindi. Mening otam va uning qo‘shnilarini ham yolg‘on yordamida noto‘g‘ri yo‘lga boshlashgan edi va men bunday yolg‘on qayerga olib borishini bilaman”, — dedi aktyor.

https://twitter.com/Schwarzenegger/status/1348249481284874240

Shvarsenegger Trampni “tarixdagi eng yomon prezident” deb atadi va u yaqinda “xuddi o‘rinsiz tvitdek” unitilishini, AQShning o‘zi esa xuddi toblangandan keyin yanada mustahkamlanadigan ritsar qilichi kabi joriy inqirozdan yanada kuchliroq bo‘lib chiqadi. Shu haqda gapirayotib, aktyor “Varvar Konan” qilichini chiqarib, kameraga ko‘rsatdi.

Shvarseneggerning fikricha, siyosiy ziddiyatlarga qaramasdan, AQShning barcha aholisi demokratiya va uning tamoyillarini birinchi o‘ringa qo‘yadi. Shu sababli ular hozir saylangan prezident Jo Baydenni qo‘llab-quvvatlashi kerak.

Eslatib o‘tamiz, AQShda 3-noyabr kuni bo‘lib o‘tgan prezident saylovlari natijalarini saylovchilar hay’ati 15-dekabr kuni qo‘llab-quvvatlab, demokratlardan nomzod Jo Baydenni g‘olib deb e’lon qildi. Kongress yakunlarni 6-yanvar kuni tasdiqlashi kerak edi. Bunga saylovda mag‘lub bo‘lgan prezident Donald Trampning tarafdorlari xalaqit berdi: ular Kongress binosi yonida yig‘ilib, ichkariga bostirib kirdi. Politsiya ularni faqat kuch bilan quvib chiqara oldi.

Kongressmenlarning bir qismi Kapitoliydan evakuatsiya qilindi. Vashingtonda komendantlik soati e’lon qilinib, tartibni saqlash uchun AQSh poytaxtiga Milliy gvardiya kuchlari kiritildi. To‘qnashuvlarda besh kishi halok bo‘ldi.

Keyinroq, 7-yanvar kuni AQSh Kongressi majlisini davom ettirib, Jo Baydenning AQShning 46-prezidenti etib saylanganini tasdiqladi va uning inauguratsiyasini 20-yanvarga belgiladi. Tramp ovoz berish yakunlaridan hamon norozi bo‘lsa-da, vakolatlarni saylangan prezidentga topshirishga tayyorligini e’lon qildi.