Indoneziyaning Sriwijaya Air kompaniyasi Boeing 737-500 samolyoti Jakartadan uchib chiqib halokatga uchradi. Asosiy ma’lumotlar

Indoneziyada Sriwijaya Air aviakompaniyasining Boeing 737-500 samolyoti halokatga uchradi. Meduza shu mavzu yuzasidan asosiy ma’lumotlarni e’lon qildi. Uning bortida 62 kishi: 50 nafar yo‘lovchi, shu jumladan, o‘n nafar bola, shuningdek, 12 nafar ekipaj a’zosi bor edi, deb yozadi CNN Indonesia, Indoneziya transport vazirligiga tayanib. SJ182 reysini amalga oshirayotgan layner Indoneziyaning G‘arbiy Kalimantan provinsiyasi ma’muriy markazi bo‘lgan Pontianak shahriga yo‘l olgan. Samolyot mahalliy vaqt bilan 14:36 da Jakartadan uchib chiqqanidan keyin darhol radarlardan g‘oyib bo‘lgan va dispetcherlarga javob bermay qo‘ygan.

Flightradar24 servisi Twitter’da xabar qilishicha, samolyot bir daqiqadan kam vaqt ichida uch kilometrdan ortiq balandlikni yo‘qotgan. Bu Jakartadan uchib chiqqandan keyin taxminan to‘rt daqiqa o‘tib yuz bergan.

This is what we know about Sriwijaya Air flight #SJ182 based on ADS-B data.

Route: Jakarta to Pontianak
Callsign: SJY182
Aircraft: Boeing 737-500, PK-CLC
Take off: 07:36 UTC
Highest altitude: 10,900 feet
Last altitude: 250 feet
Signal lost: 07:40 UTChttps://t.co/fNZqlIR2dz pic.twitter.com/CPzFJdsuJZ

— Flightradar24 (@flightradar24) January 9, 2021

Baliqchilar Jakartadan shimolda dengizdan samolyot bo‘laklarini topib olgan. Bu haqda Reuters mahalliy OAVlarga tayanib xabar berdi. CNN Indonesia mahalliy hukumatga asoslanib tasdiqlashicha, taxminiy halokat joyidan samolyotning ehtimoliy bo‘laklari va yog‘li dog‘ topilgan. Hukumat ma’lumotlariga qaraganda, bu nuqtada dengiz chuqurligi 15-20 metrga teng. Telekompaniya bo‘laklarning topilishi aks etgan videoyozuvni e’lon qildi.

https://twitter.com/CNNIndonesia/status/1347881748755976194

Keyinroq Jakarta gubernatori o‘rinbosari Ahmad Rizo Patriya samolyotning halokatga uchraganini rasman tasdiqladi. Halokat, mamlakat transport vazirligi ma’lum qilishicha, kichikroq Laki oroli yaqinida yuz bergan.

Halokatning ehtimoliy sabablari haqida hozircha ma’lumot yo‘q. Reys yo‘lovchilarining qarindoshlari Jakarta aeroportida tashkil qilingan inqiroz markaziga to‘plana boshladi. Ular rasmiy shaxslardan ma’lumot kutmoqda, ammo Sriwijaya Air to‘liq bayonot berishdan avval reys haqida batafsilroq axborot yig‘ayotganini qayd etdi. Flightradar24 ma’lumotlariga ko‘ra, samolyotning yoshi 27 yilga teng bo‘lgan, aeroportdan uchib chiqish vaqtida esa yomg‘ir yog‘ayotgan edi.

Mamlakat hukumati bortdagi barcha yo‘lovchilar Indoneziya fuqarolari bo‘lganini tasdiqladi.

Halokat joyida keng ko‘lamli qidiruv ishlari 10-yanvar kuni ertalab boshlandi. Yavan dengizidan metall bo‘laklar, odam tanasi qismlari va kiyimlar topildi. Bu haqda Associated Press rasmiy shaxslarga tayanib xabar berdi.

Milliy qidiruv-qutqaruv agentligi rahbari Bagus Puruxito so‘zlariga ko‘ra, bu topilmalar Seribu arxipelagiga kiruvchi Lnkang va Laki orollari oralig‘ida aniqlangan.

“Samolyot aynan shu yerda halokatga uchraganiga ishonchimiz komil”, — dedi Indoneziya aviatsiyasi bosh marshali Xadi Tyanjanto. Uning aytishicha, aviatsiya g‘avvoslar guruhidan olgan hisobotga ko‘ra, suvda ko‘rinish darajasi yaxshi va tiniq, bu esa samolyotning ba’zi qismlarini topish imkoniyatini bermoqda.