Qozog‘iston Milliy statistika byurosi ma’lumotiga ko‘ra, 2020-yilda tug‘ilgan aksariyat o‘g‘il bolalarga Alixon deb ism qo‘yilgan. Tengrinews’ning yozishicha, bunday ism qo‘yilgan holatlar 4577 tani tashkil qilgan.
Qayd etilishicha, Alixon ismi 2014-yildan beri qozog‘istonliklarning sevimli ismlari reytingida yetakchilik qilmoqda.
Ikkinchi eng mashhur ism — Oysulton. 3320 nafar qozog‘istonlik ota-ona o‘g‘illariga shu ismni qo‘yishga qaror qilgan. Uchinchi o‘rinda — Nurislom. 2020-yilda bunday ismli bolalar 2904 nafarga ko‘paydi.
Keyingi o‘rinlarda Amir (2314), Aldiyar (2308), Alinur (2216), Ali (2001), Ramazon — (1948), Arsen (1830), Sanjar (1815) o‘g‘il bolalar ismlari yetakchilik qilmoqda.
Qizlar uchun eng mashhur ism Medina bo‘ldi — 5403 nafar chaqaloq. Qizlarning 4855 nafariga Aylin, 4588 nafariga Ryana deb ism qo‘yilgan.
Shuningdek, 2020-yilda Aysha (4500), Asilim (4366), Ayzere (4293), Ayala (4247), Ayim (3673), Tomiris (3293) va Ayaru (3252) qozog‘istonliklarning eng sevimli ayol ismlari bo‘ldi.
Ma’lumot uchun, O‘zbekistonda 2020-yil davomida yangi tug‘ilgan chaqaloqlarga Muhammadali va Soliha ismlari eng ko‘p qo‘yilgan.
Izoh (0)