Ўзбекистонда 2021 йил 1 мартдан бошлаб аҳолининг минимал истеъмол харажатлари эълон қилинади ҳамда бу камбағаллик чегарасини билиш ва шунга қараб самарали чоралар кўриш имконини беради. Бу ҳақда Қонунчилик палатаси депутати Ўрол Ўрозбоевга таяниб, «Kun.uz» маълум қилди.
«Республикамиз бўйича ‘темир дафтар’ларга киритилган ҳар бир оилаларни камбағалликдан чиқариш борасида мутлақ янги механизмлар жорий этилади. Яъни касб-ҳунарга ўргатиш бўйича мингдан ортиқ ўқув марказлари ташкил қилинади.
Қаранг, ўқув курсларига келган ҳар бир фуқарога бир миллион сўмдан субсидия ажратилар экан. Бу мақсадга давлат бюджетидан ўртача 100 миллиард сўм маблағ ажратилади. Яна бир томони ҳар бир ўқув курсини битирган тингловчиларга тадбиркорликка йўналтирилган ускуналарни харид қилиш учун ўртача 7 миллион сўмгача субсидия берилади. Энди ўйлаб кўрайлик, қачон ҳунар ўрганиб, иш бошлаш учун бундай реал имкониятлар бўлган?» – дейди Ўрол Ўрозбоев.
Эслатиб ўтамиз, Президент Шавкат Мирзиёев раислигида 2020 йил 3 июнь куни камбағалликни қисқартириш масалалари бўйича ўтказилган видеоселектор йиғилишида 2020 йил 1 октябргача тирикчилик учун зарур энг кам миқдор ва минимал истеъмол саватчасининг ҳуқуқий асослари ишлаб чиқилишини маълум қилинган эди.
Шундан сўнг Шавкат Мирзиёев 2020 йил 29 декабрь куни Олий Мажлисга йўллаган Мурожаатномасида 2021 йилда аҳолининг минимал истеъмол харажатлари эълон қилинишини таъкидлади.
Изоҳ (0)