2021-yilda Toshkent Sharqiy aerodromida yangi fuqaro aviatsiyasi aeroport kompleksining 1-bosqich qurilish ishlari tugallanadi. Loyihaning umumiy qiymati 140 million dollarga teng. Bu haqda “O‘zbekiston Respublikasining 2021—2023-yillarga mo‘ljallangan investitsiya dasturini amalga oshirish chora-tadbirlari to‘g‘risida”gi Prezident qarorida ma’lumot berilgan.
Qarorga ko‘ra, Toshkent shahrining Yashnobod tumanida joylashgan Toshkent Sharqiy aerodromi hududida zamonaviy fuqaro aviatsiyasi aeroport kompleksining 1-bosqich qurilish ishlari 2021-yilning yakuniga qadar amalga oshiriladi.
Ta’kidlanishicha, aerodrom hududidagi fuqaro aviatsiyasi aeroport kompleksi soatiga 250 nafar yo‘lovchiga xizmat ko‘rsatishi mo‘ljallangan. Loyihaning umumiy qiymati 140 million dollar bo‘lib, shuning 40 million dollar qismi 2021-yilda o‘zlashtiriladi. Loyihaning so‘mdagi qiymati 436 milliard bo‘lib, shuning 327 milliard so‘mi Tiklanish va taraqqiyot jamg‘armasi moliyasi, 109 milliard so‘m esa tijorat banklar krediti asosida shakllantirilgan.
2017-yil iyun oyida Toshkent Sharqiy aerodromi negizida oliy darajadagi mehmonlarni kutib olish uchun aviatsiya majmuasi qurilishi to‘g‘risida xabar berilgandi. O‘shanda Mudofaa vazirligi tasarrufida bo‘lgan Toshkent Sharqiy aerodromi “O‘zbekiston temir yo‘llari” AJ tarkibiga o‘tkazilgandi. Ayni paytda loyiha “O‘zbekiston temir yo‘llari” tomonidan amalga oshirilmoqda.
Loyihaning birinchi bosqichida uchish-qo‘nish chizig‘i va sutkasiga 6 ming yo‘lovchini o‘tkazish imkoniyatiga ega bo‘lgan terminal barpo etish rejalashtirilgan. Barcha qurilish ishlari 2018—2020-yillarda davom etishi nazarda tutilgandi.
Mavzuga doir: Toshkent-Sharqiy aerodrom bazasida tadbirkor va ishbilarmon doira vakillari uchun kompleks barpo etiladi
Izoh (0)