Тошкент вилояти Оҳангарон туманида фермер хўжалигига ўғирлик уюштирган 5 нафар шахс қўлга олинди, дея хабар бермоқда Тергов департаменти.
Маълум қилинишича, 2020 йилнинг 25 декабрь куни соат 20:30 ларда муқаддам судланган 30 ёшли Абдуҳамид Ф. ўзганинг мол-мулкини босқинчилик йўли билан талон-торож қилиш мақсадида танишлари 26 ёшли Саъдулла А., Шоҳрух Ф. ҳамда 25 ёшли Ҳасан С. ва Даврон исмли шахслар билан олдиндан жиноий тил бириктирган.
Улар бир гуруҳ бўлиб, Оҳангарон тумани «Шодмалик» МФЙда жойлашган фермер хўжалигига кирган. Хўжалик қоровулхонасидаги ойнани синдириб, ойна синиғи ва ўша ерда бўлган ёғоч таёқлар билан қуролланиб, фермер хўжалигининг 9 нафар ишчисига ҳужум қилиб, уларни ўлдириш билан қўрқитган.
Жиноий гуруҳ ишчиларга турли хил тан жароҳатлари етказиб, нархи 120 минг сўмлик икки дона Махvi русумли қўл телефонлари ва нархи 145 минг сўмлик қора рангли куртка, нархи 150 минг сўм бўлган Fly русумли қўл телефони, нархи 40 минг сўмлик Nokia 1110 русумли уяли телефони ҳамда нархи 180 000 сўмлик Inoi русумли уяли телефонларини талон-торож қилиб, ҳодиса жойидан яширинган.
Натижада фермер хўжалик ишчилари турли тан жароҳатлари билан Оҳангарон тумани марказий шифохонасига мурожаат қилган.
Олиб борилган терговга қадар текширув жараёнида юқоридаги шахслардан ашёвий далил тариқасида талон-торож қилинган буюмлар расмийлаштириб олинган.
Мазкур ҳолат юзасидан Оҳангарон тумани ИИБ ҳузуридаги Тергов бўлими томонидан Жиноят кодексининг 164-моддаси 2-қисми «Б» банди (бир гуруҳ шахслар томонидан олдиндан тил бириктириб содир этилган босқинчилик) билан жиноят иши қўзғатилган.
Тергов жараёнида юқоридаги жиноятни содир этган шахсларнинг ҳар бирига айблов эълон қилиниб, қамоққа олиш тарзидаги эҳтиёт чораси қўлланилган.
Аввалроқ Қўйлиқда фоҳишалик қилувчи аёл мижоз сифатида келган эркакнинг телефони ва 500 долларини тунаб кетгани, Бухорода ўғирлик қилишига халал берган 13 ёшли қизни болға билан уриб ўлдиришга уринган аёл ҳамда Тошкент вилоятида Миллий гвардия ҳарбий кийимини кийиб олган босқинчилар қўлга олингани ҳақида хабар берилганди.
Изоҳ (0)