Сўнгги кунларда Ўзбекистон аҳолиси ғайриоддий ҳодисани кузатиши мумкин — қор доналари худди тумандан тушгандек ёғади. «Gazeta.uz» бу ҳодиса юзасидан «Ўзгидромет»дан изоҳ олди.
Маълум қилинишича, бу ҳодиса Ўзбекистонда ниҳоятда кам учрайди, кўпинча у қиши барқарор совуқ ҳудудларда кузатилади. Ушбу ҳодисанинг вужудга келиши совуқ Сибир антициклонининг таъсири билан боғлиқ. Одатда, бундай синоптик вазиятда ёғингарчилик кузатилмайди.
«Бироқ ер сиртидаги ҳаво қатламининг тунда кучли совиши туфайли, ҳарорат инверсияси юзага келади, яъни пастки ҳаво қатламлари юқоридагига қараганда совуқроқ бўлади. Натижада конвекцияга тўсқинлик қилувчи ‘ёпиб қўювчи’ қатлам ҳосил бўлади. Бундай ҳолатда муттасил равишда ишлайдиган қозонхоналар қувурларидан ҳавога чиқариладиган кўп миқдордаги илиқ буғ худди шу қатламга ‘урилиб’, кондесацияланиб (қуюқлашиб, зичлашиб) қор доналари шаклида ерга тушади», — деб қайд этган «Ўзгидромет».
Ушбу ҳодисани ўрганган айрим тадқиқотчилар буни «техноген қор» деб атайди. Аммо «Ўзгидромет»нинг билдиришича, бу унчалик ҳам тўғри эмас: «Бу антропоген омил таъсирида ўзгарган табиат ҳодисасидир».
Эслатиб ўтамиз, «Ўзгидромет» мамлакатда ҳафта давомида аномал совуқ бўлиши кутилаётганини маълум қилган.
Мавзуга доир: Фото: Булдуруқистонга айланган Ўзбекистон
Изоҳ (0)