J-United Group компанияси Наманган туманидаги логистика марказини кенгайтиришга 21,8 миллиард сўм (салкам 2 миллион доллар) инвестиция киритишни режалаштирмоқда. Бу ҳақда Ўзбекистоннинг 2021—2023 йилларга мўлжалланган инвестиция дастурига таяниб, «Gazeta.uz» хабар берди.
Корхона ва ташкилотларнинг ягона давлат регистрига кўра, 2002 йилнинг августида рўйхатдан ўтказилган J-United Group’нинг ягона таъсисчиси Тошкент ҳокими Жаҳонгир Ортиқхўжаев ҳисобланади.
Компания раҳбари сифатида Абдураҳим Аминов кўрсатилган. Иқтисодий фаолият классификатори коди сифатида — дам олиш ва истироҳат боғлари фаолияти кўрсатилган.
Корхона ва ташкилотларнинг ягона давлат регистридаги очиқ маълумотларига кўра, Жаҳонгир Ортиқхўжаев, шунингдек, Dream Production компанияси (100 фоиз, бошқа жойларда таснифланмаган техникалар, ускуналар ва моддий бойликларни ижарага ва лизингга бериш), Vedanta Production ( 100 фоиз, нотурар жойлар ижараси ва уларни бошқариш), Ekzotella (100 фоиз, нотурар жойлар ижараси ва уларни бошқариш), Sky Wind Systems (100 фоиз, маиший электроника буюмларини ишлаб чиқариш), Techno Profil (100 фоиз, нотурар жойлар ижараси ва уларни бошқариш) ва «Ўзгазлойиҳа» (34,47 фоиз) таъсисчиси ҳисобланади. Уларнинг барчаси 1991—2014 йиллар оралиғида таъсис этилган, Жаҳонгир Ортиқхўжаев эса 2018 йилнинг апрелидан буён пойтахт ҳокими ҳисобланади.
2020 йилнинг январида эса ҳоким Британиянинг Open Democracy нашри суриштирувига изоҳ берган. Мақолада Tashkent City лойиҳасини амалда оширишда Жаҳонгир Ортиқхўжаевга боғлиқ компаниялар шуғулланаётгани ёзилганди.
«Президент мени шаҳар ҳокими этиб тайинлаганида, компания бошқарувини бошқа шахсларга ўтказишим талаб қилинган, лекин компаниядаги улушимдан воз кечишим ҳақида айтилмаган», — деганди ҳоким.
Давлат хизматчиларига улушларга эгалик қилиш тақиқланмаган
Адлия вазирлиги давлат ҳокимияти органларида ишлайдиган инсонлар МЧЖ, АЖ, ҚК мақомига эга компанияларда улушга эга бўла олиш ёки олмаслиги тўғрисидаги сўровга жавоб берган.
Вазирликнинг таъкидлашича, Вазирлар Маҳкамасининг 1992 йил 6 мартдаги 103-сонли «Тадбиркорлик фаолияти билан шуғулланиш тақиқланган мансабдор шахсларнинг рўйхати тўғрисида»ги қарорига кўра, давлат ҳокимияти ва бошқарув органларининг хизматчиларига тадбиркорлик фаолияти билан шуғулланиш тақиқланган.
«Тадбиркорлик фаолияти эркинлигининг кафолатлари тўғрисида»ги қонуннинг 3-моддасига кўра, тадбиркорлик фаолияти (тадбиркорлик) тадбиркорлик фаолияти субъектлари томонидан қонун ҳужжатларига мувофиқ амалга ошириладиган, ўзи таваккал қилиб ва ўз мулкий жавобгарлиги остида даромад (фойда) олишга қаратилган ташаббускорлик фаолияти ҳисобланади.
Мазкур қонуннинг 4-моддасига кўра, тадбиркорлик фаолияти субъектлари (тадбиркорлик субъектлари) белгиланган тартибда давлат рўйхатидан ўтган ҳамда тадбиркорлик фаолиятини амалга ошираётган юридик ва жисмоний шахслар ҳисобланиши қайд этилган.
Шу билан бирга, жисмоний шахсларнинг тижорий ташкилотлар устав фондида улуш (акциялар)га эгалик қилиш тадбиркорлик субъекти сифатида давлат рўйхатидан ўтишни талаб қилмайди.
Улуш (акция)га эгалик қилиш юқоридаги қонун ҳужжатлари орқали белгилаб берилган «тадбиркорлик фаолияти» тушунчасига мос келмайди.
Шундан келиб чиқиб, Адлия вазирлигининг таъкидлашича, амалдаги қонунчиликка кўра, тижорат ташкилотларининг улушлари (акциялари)га эгалик қилиш билан бир вақтнинг ўзида давлат органларида лавозим эгаллаши тўғридан-тўғри тақиқланмаган.
Изоҳ (0)