2020-yil davomida 780 mingdan ziyod mobil qurilmalar bojxona rasmiylashtiruvidan o‘tkazilgan. Bu haqda 4- yanvar kuni O‘zbekiston Telekommunikatsiya tarmoqlarini boshqarish respublika markazida o‘tkazilgan matbuot anjumanida ma’lum qilindi, deya xabar bermoqda “Daryo” muxbiri Mirolim Isajonov.
O‘zbekiston Telekommunikatsiya tarmoqlarini boshqarish respublika markazi direktori Ulug‘bek Shokirovning ta’kidlashicha, IMEI kodini ro‘yxatga olishdan tushgan mablag‘lar uchun maxsus bitta hisobraqam ochilgan. 2020-yilning dekabrigacha mobil qurilmalarning IMEI kodini ro‘yxatdan o‘tkazishdan 240 milliard so‘m mablag‘ kelib tushgan.
“Mobil qurilmalarning IMEI kodini ro‘yxatdan o‘tkazishga oid Nizomning 43-bandida mablag‘lar qayerga sarflanishi to‘g‘risida to‘liq yozib qo‘yilgan. Ushbu mablag‘lar Respublika telekommunikatsiya infratuzilmasi, shu jumladan, qishloq va chekka aholi punktlari, turistik hududlarning rivojlanish loyihalariga yo‘naltiriladi. Bundan tashqari, Vazirlar Mahkamasining qaroriga muvofiq, davlat organlarida amalga oshirilayotgan axborot kommunikatsiya texnologiyalarini joriy etish loyihalarini maqsadli moliyalashtirish uchun sarflanadi. Agar moliyalashtiradigan joylar qolmasa, ortgan mablag‘lar axborot kommunikatsiya texnologiyalarini rivojlantirish jamg‘armasi hisobiga o‘tkaziladi. Shuni alohida ta’kidlash kerakki, tizim orqali tushayotgan mablag‘lar respublikamizda IT-texnologiyalarni rivojlantirish borasida olib borilayotgan ishlarni moliyalashtirish uchun sarflanadigan pullarning bir foizini ham tashkil qilmaydi”, — dedi Ulug‘bek Shokirov.
Izoh (0)