Тошкент вилояти Бўстонлиқ туманининг тоғли қисмида жойлашган айрим йўлларда 5 январь кунига қадар автомобилларнинг бир томонлама ҳаракати ташкил этилади. Бу ҳақда ИИВ ЙҲХББ ахборот хизмати «Дарё»га маълум қилди.
Аввалроқ Чимёнда дам олувчилар сонининг кескин ортиб кетгани сабаб тоғга кўтарилиш йўлида машиналар ҳаракати вақтинча чеклангани тўғрисида хабар берилганди.
Маълум қилинишича, тумандаги йўлларнинг ўтказувчанлик қобилиятини инобатга олиниб, турли кўнгилсизликларнинг олдини олиш мақсадида автомобиллар ҳаракатланиши чекланмоқда.
«5 январь кунига қадар 4Р-12 Бектемир—Чорбоғ автомобиль йўлининг 61-километридан 4Р-6 Тошкент—Чирчиқ—Чимён автомобиль йўлининг 57-километрига ўтиш қисмидан, яъни Бўстонлиқ туманининг Ғазалкент шаҳридан чиқиш жойидан то 4Р-6 автомобиль йўлининг 87-километрига — Бўстонлиқ тумани Юсуфхона аҳоли яшаш жойига қадар автомобилларнинг ҳаракатланиши бир томонлама қилиб ташкил этилади», — дейилади хабарда.
Идора матбуот хизмати ушбу ҳолатда барча ҳайдовчилардан вазиятни тўғри тушуниб, ўрнатилган йўл белгиларига риоя қилишни, хизматга жалб қилинган ЙПХ инспекторларининг ишора ва кўрсатмаларига амал қилиб ҳаракатланишни сўрайди.
Эслатиб ўтамиз, Янги йил байрами арафасидаги дам олиш кунлари 2020 йил 3 декабрдаги Президент фармони асосида белгиланган. Унга кўра, 2 январь, шанба куни 6 кунлик иш ҳафтасида меҳнат қилаётганлар учун ҳам дам олиш куни ҳисобланади.
Изоҳ (0)