25-dekabr kuni Xitoyda “Game of Thrones: Winter Is Coming” strategiyasi orqali mashhurlikka erishgan o‘yin ishlab chiqaruvchi Yoozoo Group kompaniyasi asoschisi va rahbari milliarder Lin Si vafot etdi, deb yozadi Meduza. U 39 yoshda edi. Yoozoo direktorlar kengashi 26-dekabr kuni uning o‘limi haqida bayonot e’lon qildi, ammo buning sababini keltirmadi.
Sal keyinroq Shanxay politsiyasi Lin Si zaharlanganini ma’lum qildi. Biznesmenning o‘limiga aloqadorlikda gumonlanib, uning Syuy familiyali 39 yoshli hamkasbi qo‘lga olindi. Politsiyachilar ma’lum qilishicha, 17-dekabr kuni ehtimoliy zaharlanish belgilari bilan Lin Si yotqizilgan kasalxonadan ularga xabar berilgan. Tekshiruv chog‘ida politsiya jinoyatni katta ehtimol bilan biznesmenning hamkasbi sodir etgan degan xulosaga kelgan.
Politsiya qo‘lga olingan odam haqida boshqa tafsilotlarni keltirmadi. Ish doirasida Yoozoo kompaniyasining kino ishlab chiqarish bo‘limi rahbari Syuy Yao qo‘lga olingan bo‘lishi mumkin, deya xabar qiladi Pekinning Caixin nashri o‘yin sanoatidagi anonim manbalariga tayanib. Ularning so‘zlariga ko‘ra, Syuy Yao Yoozoo’da “Uch jism muammosi” seriali — xitoylik fantast-yozuvchi Lyu Sisinning shu nomli romani adaptatsiyasi ustida ishlagan, asar ingliz tiliga tarjima qilinganidan keyin keng jamoatchilik e’tirofiga tushgan. Ushbu serial Netflix striming servisiga chiqarilishi rejalashtirilgan edi.
Zaharlanishdan avval kompaniya rahbari va uning qo‘l ostidagi xodim o‘rtasida nizo chiqqan bo‘lishi mumkin, deb yozadi The Hollywood Reporter Xitoy nashrlariga tayanib. Ularning taxminlariga ko‘ra, Lin Si bir piyola puer choyi yordamida zaharlangan. Ammo Variety qayd etishicha, hozir bu versiya asosiy bo‘lmay qolgan. XXR Kommunistik partiyasiga aloqador Xitoy OAVlarida Syuy kompaniya rahbarini “ishga aloqador kelishmovchiliklar” sababli zaharlagani, buning uchun doridan foydalangani haqidagi versiya aytilmoqda. Boshqa manbalar Lin Si bir necha xil zaharlar aralashmasi bilan zaharlanganini taxmin qilmoqda.
Lin Si Yoozoo’ga 2009-yilda asos solgan. Kompaniya avvalo video‘yinlar chiqaruvchi studiya sifatida mashhur. “Taxtlar o‘yini” seriali asosida yaratilgan “Game of Thrones: Winter Is Coming”’dan tashqari, uning portfeliga, xususan, “League of Angels” va “Drakensang Online” onlayn rol o‘ynash o‘yinlari kiradi. Bundan tashqari, Xitoyning Tencent xoldingi bilan birga yaratilgan “Brawl Stars” mobil o‘yini ishlab chiqaruvchilaridan biriga aylandi.
2014-yilda Yoozoo kompaniyasi film yaratish bilan shug‘ullana boshladi. Bir yildan keyin u “Uch jism muammosi” romanini ekranlashtirish huquqini qo‘lga kiritdi. Dastlab kompaniya kitobni mustaqil ekranlashtirmoqchi edi, ammo 2020-yil sentabrda Netflix bilan shu kitob asosida serial chiqarishga kelishib oldi. Lin Si “Taxtlar o‘yini” seriali shouranerlari Devid Benioff va Den Vays bilan bir qatorda, loyihaning prodyuserlaridan biriga aylandi.
Lin Si Hurun Report talqini bo‘yicha Xitoyning eng boy tadbirkorlari ro‘yxatida 870-o‘rinni egallagan edi. Uning boyligi 6,8 milliard yuan (bir milliard dollar)ga baholangan.
Izoh (0)