“Uyda yolg‘iz” filmi suratga olingan mashhur uy 30 yil ichida qanchalik o‘zgardi? (foto, video)

1990-yil noyabr oyida “Uyda yolg‘iz” filmi katta ekranlarda namoyish etilgan va shu ondayoq AQShda eng ko‘p daromad ko‘rgan Yangi yil haqidagi filmga aylangan. Filmda jajji aktyor Makoley Kalkin tasodifan Yangi yilda yolg‘iz qolib ketgan 8 yoshli Kevin Makkalister qahramoni rolida gavdalangan. Bolakay nafaqat bir o‘zi qo‘rquvni yengib yashaydi, balki uyni o‘g‘rilardan himoya qilib, ularni qo‘lga tushirishga ham yordam beradi.

Tomoshabinlar Makkalisterlar oilasini chin dildan yaxshi ko‘rib qolgan va hattoki juda ko‘p sarguzashtlar ro‘y bergan uyga ham alohida qiziqish bildirgan. Ma’lumot uchun, Makkalisterlar xonadoni hayotda ham mavjud bo‘lib, uning manzili — Illinoys shtatining Uinnetka shahrida, Linkoln prospektidagi 671-uy. Film muvaffaqiyatidan so‘ng “Kevinning uyi” davlat diqqatiga sazovor joyga aylandi va o‘tayotgan barcha sayyohlar uning oldida, albatta, suratga tushadi.

Kartinaning 30 yilligi munosabati bilan ushbu xonadon ta’mirlandi va muxlislar uyning hozirgi va avvalgi ko‘rinishi bilan taqqoslash imkoniyatiga ega bo‘ldi. Quyidagi suratlarda “Kevinning uyi” jiddiy o‘zgarishlarga uchragan va ayrim xonalarni esa umuman tanib bo‘lmaydi.

Uch qavatli qizil g‘ishtdan iborat xonadonning umumiy maydoni 390 kvadrat metrni tashkil qiladi. 4 ta yotoqxona, 5 ta hammom, garaj hamda issiqxonalar ham mavjud. Ushbu xonadon 1988-yil Abendishlar oilasi tomonidan sotib olingan. Oila 1,5 yil davom etadigan suratga olish guruhini xursandchilik bilan qabul qilgan. Qizig‘i shundaki, uzoq muddat davom etgan suratga olish jarayonida Abendishlar oilasi boshqa joyga ko‘chib o‘tmagan va filmning barcha sahnalarini kuzatish imkoniyatidan foydalangan.

2018-yil Makoley Kalkin muxlislarini xursand qilib, uni chinakam yulduzga aylantirgan filmdagi ramziy voqealarni takrorladi. Shuningdek, aqlli uy texnikalarini ham reklama qildi. Unda aktyor o‘ziga xos hazil tuyg‘usi bilan filmning eng kulgili onlarini qaytardi.