1990 йил ноябрь ойида «Уйда ёлғиз» фильми катта экранларда намойиш этилган ва шу ондаёқ АҚШда энг кўп даромад кўрган Янги йил ҳақидаги фильмга айланган. Фильмда жажжи актёр Маколей Калкин тасодифан Янги йилда ёлғиз қолиб кетган 8 ёшли Кевин Маккалистер қаҳрамони ролида гавдаланган. Болакай нафақат бир ўзи қўрқувни енгиб яшайди, балки уйни ўғрилардан ҳимоя қилиб, уларни қўлга туширишга ҳам ёрдам беради.
Томошабинлар Маккалистерлар оиласини чин дилдан яхши кўриб қолган ва ҳаттоки жуда кўп саргузаштлар рўй берган уйга ҳам алоҳида қизиқиш билдирган. Маълумот учун, Маккалистерлар хонадони ҳаётда ҳам мавжуд бўлиб, унинг манзили — Иллинойс штатининг Уиннетка шаҳрида, Линколн проспектидаги 671-уй. Фильм муваффақиятидан сўнг «Кевиннинг уйи» давлат диққатига сазовор жойга айланди ва ўтаётган барча сайёҳлар унинг олдида, албатта, суратга тушади.
Картинанинг 30 йиллиги муносабати билан ушбу хонадон таъмирланди ва мухлислар уйнинг ҳозирги ва аввалги кўриниши билан таққослаш имкониятига эга бўлди. Қуйидаги суратларда «Кевиннинг уйи» жиддий ўзгаришларга учраган ва айрим хоналарни эса умуман таниб бўлмайди.
Уч қаватли қизил ғиштдан иборат хонадоннинг умумий майдони 390 квадрат метрни ташкил қилади. 4 та ётоқхона, 5 та ҳаммом, гараж ҳамда иссиқхоналар ҳам мавжуд. Ушбу хонадон 1988 йил Абендишлар оиласи томонидан сотиб олинган. Оила 1,5 йил давом этадиган суратга олиш гуруҳини хурсандчилик билан қабул қилган. Қизиғи шундаки, узоқ муддат давом этган суратга олиш жараёнида Абендишлар оиласи бошқа жойга кўчиб ўтмаган ва фильмнинг барча саҳналарини кузатиш имкониятидан фойдаланган.
2018 йил Маколей Калкин мухлисларини хурсанд қилиб, уни чинакам юлдузга айлантирган фильмдаги рамзий воқеаларни такрорлади. Шунингдек, ақлли уй техникаларини ҳам реклама қилди. Унда актёр ўзига хос ҳазил туйғуси билан фильмнинг энг кулгили онларини қайтарди.
Мавзуга доир:
Изоҳ (0)