Rossiyada noyabr oyida 2019-yilning shu davriga nisbatan 79 ming nafarga ko‘proq odam vafot etdi

Rossiyada 2020-yilning noyabr oyida 219 872 kishi vafot etgan, deb yozadi Meduza “Rosstat” ma’lumotlariga tayanib.

Mamlakatda 2019-yilning noyabriga nisbatan 56 foizga ko‘p o‘limlar qayd etilgan (qo‘shimcha 78 541 ta o‘lim).

Shu bilan birga, “Rosstat” ma’lumotlariga ko‘ra, koronavirus 19 626 kishining vafoti uchun asosiy sabab bo‘lgan. Yana 3984 ta holatda koronavirusning borligi laboratoriya tomonidan tasdiqlanmagan bo‘lsa-da, u asosiy sabab deb taxmin qilinadi. 2178 kishining o‘limiga sabab bo‘lgan boshqa kasalliklarning kechishiga ham koronavirus o‘z ta’sirini o‘tkazgan, yana 9857 nafar marhumda COVID-19 tashxisi bo‘lgan, ammo o‘lim kelib chiqishida uning hech qanday roli bo‘lmagan.

Shu tariqa, “Rosstat” bergan ma’lumotlarga ko‘ra, koronavirus 25 788 kishining o‘limiga bevosita yoki bilvosita ta’sir qilgan, bu 2019-yil noyabridagi o‘limlarga nisbatan o‘sishning uchdan biri demakdir.

Rossiya bosh vaziri o‘rinbosari Tatyana Golikovaning aytishicha, 2020-yilning 11 oyi ichida o‘lim holatlari 13,8 foizga o‘sgan, bu o‘sishning 81 foizi koronavirus bilan bog‘liq.

Nashr eslatishicha, oktabrda Rossiyada o‘limlar soni 2019-yilgi ko‘rsatkichlardan 30,3 foizga oshgan edi (qo‘shimcha 47 777 ta o‘lim). Shu oy ichida 15 607 kishi koronavirus yoki uning asoratlaridan vafot etgan.