Eron general Qosim Sulaymoniy o‘ldirilishida ishtirok etgan 48 kishining ro‘yxatini tuzdi. Bu haqda Mehr News’ga tayanib, “Korrespondent.net” xabar berdi.
“Eron rasmiylari Sulaymoniy o‘ldirilishida ishtirok etgan 48 kishini aniqlay oldi va ularni javobgarlikka tortish choralarini ko‘rdi”, — dedi mamlakat Inson huquqlari bo‘yicha kengashi rahbari Ali Bagari Kani. Shuningdek, rasmiy Tehron Islom inqilobi muhofizlari korpusi qo‘mondonini yo‘q qilish operatsiyasida ishtirok etgan mamlakatlarga murojaat qilib, ma’lumot berishni talab qilgan.
Ma’lum qilinishicha, Eron hukumati bunday iltimos bilan murojaat qilgan so‘nggi mamlakat Germaniya bo‘ldi.
“Bizga Germaniyadagi AQShning Ramshteyn aviabazasi va Sulaymoniy o‘ldirish uchun foydalanilgan uchuvchisiz samolyotlar o‘rtasida ma’lumotlar almashinuvi bo‘lgani to‘g‘risida hujjat kelib tushdi”, – deydi rasmiy.
Eslatib o‘tamiz, Qosim Sulaymoniy 2020-yil 3-yanvar kuni AQSh havo kuchlari tomonidan Bag‘dod aeroportiga berilgan aviahujum oqibatida o‘ldirilgandi. Zarba AQSh prezidenti Donald Tramp farmoyishiga asosan berilgan.
U IIMKni terrorchilik tashkiloti deb hisoblagan va Qosim Sulaymoniyni mintaqada, xususan, Iroqda bo‘lib turgan amerikalik diplomatlar va harbiylarga hujum qilishni rejalashtirganlikda ayblagan. Eron esa unga javoban Iroqdagi Amerika bazasiga hujum qilgan. Buning oqibatida 100 dan ortiq amerikalik jarohatlangan.
Izoh (0)