Аргентина президенти вакциналар атрофидаги савдо ва геосиёсий баҳс ҳақида гапирди

Аргентина президенти Альберто Фернандез коронавирус пандемияси чоғида баъзи вакциналарнинг бошқа кучлар томонидан обрўсизлантириш ҳолатлари учраётганини айтди. Унинг фикрича, мамлакатга етказиб берилган «Спутник V» вакцинаси «савдо уруши» ва «геосиёсий баҳс» объектига айланган. Бу ҳақда «Коммерсантъ» хабар бермоқда.

«Ҳисобга олиш керак бўлган биринчи нарса шуки, савдо уруши бошланди. Бундан ташқари, дунё вакцинани қўлга киритишга ташна бўлгани сабабли уни ким тақдим этиши ҳақида геосиёсий баҳс олиб борилмоқда», — деди Фернандез Televisin Publica’га берган интервьюсида. Унинг фикрича, «Спутник V» ишлаб чиқарувчиси — Гамалея номидаги марказ билан айнан шу нарса содир бўлган.

Аргентинада вакцинация 29 декабрда бошланади. Буэнос-Айрес провинциясида эмланиш учун 315 киши рўйхатдан ўтган. Биринчи босқичда фақат тиббиёт ходимлари эмланиши мумкин, кейинроқ дастурга таълим ва ҳуқуқ-тартибот органлари ходимлари, шунингдек, 60 ёшдан ошган ва сурункали касалликлари бўлган одамлар ҳам киритилади.

Аввалроқ Евроиттифоқ ташқи сиёсий хизмати раҳбари Жозеп Боррел Россия давлат томонидан назорат қилинадиган ОАВлар орқали Ғарбдаги вакцина ишлаб чиқувчилар ҳақида дезинформация тарқатаётганини айтган эди. Унинг фикрича, дезинформация «Россия ўзининг Спутник V вакцинасини сотишни хоҳлаган» мамлакатларга қаратилган.

Эслатиб ўтамиз, Аргентина Россияда яратилган коронавирусга қарши «Спутник V» вакцинасини рўйхатдан ўтказди. Вакцина Россияда ўтказилган клиник тадқиқотлар асосида ва Аргентинанинг ўзида қўшимча синовларсиз, тезлаштирилган жараён доирасида маъқулланган.