Turizmni rivojlantirish davlat qo‘mitasi “O‘zbekiston Respublikasida ziyorat turizmini yanada rivojlantirish va ziyoratchilar uchun qulay shart-sharoitlar yaratish chora-tadbirlari to‘g‘risida”gi Prezident farmoni loyihasini muhokamaga qo‘ydi.
Loyihaga ko‘ra, Moliya vazirligi, Uzbekistan Airports AJ, “O‘zbekiston temiryo‘llari” AJ, Turizmni rivojlantirish davlat qo‘mitasi va Xususiy turizm tashkilotlari assotsiatsiyasi bilan birgalikda ziyorat turizmi va ichki turizmni rivojlantirish doirasida Andijon—Urganch—Andijon aviareysini yo‘lga qo‘yish va Andijon—Xiva—Andijon temiryo‘l reyslari sonini oshirish, shuningdek, avia va temiryo‘l chiptalariga turoperatorlar tomonidan sotib olingan taqdirda (joylashtirish vositalarida kamida bir kecha tunab qolish sharti bilan) 30 foizlik chegirma joriy qilish mexanizmini ishlab chiqadi va amalga oshiradi.
Shuningdek, 2021-yil 1-iyuldan boshlab ushbu mexanizmning Termiz, Buxoro va Samarqand shaharlarida qo‘llanilishi ta’minlanadi. 2021-yil 1-aprelgacha esa Termiz—Qarshi—Xiva yo‘nalishi bo‘yicha doimiy temiryo‘l qatnovini yo‘lga qo‘yish choralari ko‘riladi.
Loyihada qayd etilishicha, “halol”, “kosher” va “vegan” yo‘nalishiga o‘rnatilgan tartibda ixtisoslashgan umumiy ovqatlanish shoxobchalari foydalanishga topshirilgan kundan e’tiboran 3 yil muddatga — yuridik shaxslardan olinadigan foyda solig‘i, yer solig‘i va mol-mulk solig‘i, shuningdek, yagona soliq to‘lovining 50 foizini to‘lashdan ozod etiladi.
2021-yil 1-yanvardan 31-dekabrga qadar turoperatorlar, turagentlar, shuningdek, joylashtirish vositalari ijtimoiy soliqni kamaytirilgan stavkada — 1 foiz miqdorida to‘laydi, yuridik shaxslardan olinadigan yer solig‘i va yuridik shaxslarning mol-mulkiga solinadigan soliqni to‘lashdan ozod qilinadi.
Avvalroq O‘zbekiston 2021-yilda ziyorat turizmi uchun 5 mingga yaqin aviareys tashkil qilishni rejalashtirayotgani to‘g‘risida xabar berilgandi.
Izoh (0)