Qo‘qonda gaz va elektr ta’minotidagi uzilishlardan norozi ayollar shahar hokimligi oldidagi yo‘lni to‘sib qo‘ygani to‘g‘risida xabar berilgandi. Shahar hokimligi norozilik bildirgan mahalla — 5-“Vaqf chorus” aholisi uchun yangi gaz taqsimlash stansiyasi barpo etishga va’da bergan.
Qo‘qon shahri hokimligi matbuot xizmatining ma’lum qilishicha, shahar hokimi Ma’ruf Usmonov boshchiligidagi ishchi guruh holatni o‘rgangan. Fuqarolarga Qo‘qon shahri aholisini, shu jumladan, 5-“Vaqf chorsu” hududida yashaydigan fuqarolarning xonadonlarida tabiiy gaz ta’minotini yaxshilash maqsadida yangi gaz taqsimlash stansiyasi (GTS) barpo etilayotgani va yil oxirigacha foydalanishga topshirilishi tushuntirilgan.
Tez kunlarda ishga tushadigan yangi GTS yuqori bosimli quvurdan to‘g‘ridan to‘g‘ri tabiiy gaz qabul qilish imkonini beradi. Natijada 5-“Vaqf chorsu” mahallasida tabiiy gaz ta’minoti yaxshilanadi.
Hokimlikning qo‘shimcha qilishicha, mahalla fuqarolari xonadonlarini isitish uchun arzon narxlarda ko‘mir va xo‘jalik yumushlari uchun suyultirilgan gaz yetkazib berilmoqda, bu ishlarning olib borilishi alohida nazoratga olingan.
Avvalroq Surxondaryoning Muzrabot tumanida ham elektr ta’minotidagi uzilishlardan norozi aholi yo‘lni to‘sib qo‘ygani haqida xabar berilgan edi.
Izoh (0)