Туризмни ривожлантириш давлат қўмитаси «Ўзбекистон Республикасида зиёрат туризмини янада ривожлантириш ва зиёратчилар учун қулай шарт-шароитлар яратиш чора-тадбирлари тўғрисида»ги Президент фармони лойиҳасини муҳокамага қўйди.
Лойиҳага кўра, Молия вазирлиги, Uzbekistan Airports АЖ, «Ўзбекистон темир йўллари» АЖ, Туризмни ривожлантириш давлат қўмитаси ва Хусусий туризм ташкилотлари ассоциацияси билан биргаликда зиёрат туризми ва ички туризмни ривожлантириш доирасида Андижон—Урганч—Андижон авиарейсини йўлга қўйиш ва Андижон—Хива—Андижон темир йўл рейслари сонини ошириш, шунингдек, авиа ва темир йўл чипталарига туроператорлар томонидан сотиб олинган тақдирда (жойлаштириш воситаларида камида бир кеча тунаб қолиш шарти билан) 30 фоизлик чегирма жорий қилиш механизмини ишлаб чиқади ва амалга оширади.
Шунингдек, 2021 йил 1 июлдан бошлаб ушбу механизмнинг Термиз, Бухоро ва Самарқанд шаҳарларида қўлланилиши таъминланади. 2021 йил 1 апрелгача эса Термиз—Қарши—Хива йўналиши бўйича доимий темир йўл қатновини йўлга қўйиш чоралари кўрилади.
Лойиҳада қайд этилишича, «ҳалол», «кошер» ва «веган» йўналишига ўрнатилган тартибда ихтисослашган умумий овқатланиш шохобчалари фойдаланишга топширилган кундан эътиборан 3 йил муддатга — юридик шахслардан олинадиган фойда солиғи, ер солиғи ва мол-мулк солиғи, шунингдек, ягона солиқ тўловининг 50 фоизини тўлашдан озод этилади.
2021 йил 1 январдан 31 декабрга қадар туроператорлар, турагентлар, шунингдек, жойлаштириш воситалари ижтимоий солиқни камайтирилган ставкада — 1 фоиз миқдорида тўлайди, юридик шахслардан олинадиган ер солиғи ва юридик шахсларнинг мол-мулкига солинадиган солиқни тўлашдан озод қилинади.
Аввалроқ Ўзбекистон 2021 йилда зиёрат туризми учун 5 мингга яқин авиарейс ташкил қилишни режалаштираётгани тўғрисида хабар берилганди.
Изоҳ (0)