Qashqadaryo viloyatida 2020-yilning o‘tgan davri mobaynida og‘ir vaziyatga tushib qolgan 160 nafar xotin-qiz uyli bo‘ldi. Bu haqda “Daryo”ga “Qishloqqurilishinvest” MChJ injiniring kompaniyasi viloyat filiali direktori Qo‘yli Narzullayev xabar berdi.
Ta’kidlanishicha, viloyatda 2020-yil Prezident qaroriga muvofiq qiymati 241 milliard 200 million so‘m bo‘lgan 1475 ta arzon uy-joy qurilgan.
“1475 ta uyning 1080 tasi qishloq joylarda namunaviy loyihalar asosida qurilgan arzon uy-joylar bo‘lib, 160 nafar og‘ir ijtimoiy vaziyatga tushib qolgan ayol, 10 ta alohida namuna ko‘rsatayotgan yosh oila, 910 ta uy-joy sharoitini yaxshilashga muhtoj oilaga berildi”, — deydi filial direktori Qo‘yli Narzullayev.
Aytilishicha, ana shunday uylar 27-dekabr, yakshanba kuni Mirishkor va Shahrisabz tumanlarida foydalanishga topshirilgan.
“Tumanda kam ta’minlanganlar uchun mo‘ljallab qurilgan 24 xonadonli 2 ta uyni qurib bitkazdik va aholiga topshirdik. Yangi xonadonlar aholi uchun Yangi yil sovg‘asi bo‘lsa, ajabmas”, — deydi quruvchi tashkilot rahbari Muhammadqul Ro‘zimurodov.
Eslatib o‘tamiz, avvalroq Qashqadaryoda 2020-yil yakuniga qadar 1140 xonadonli 47 ta arzonlashtirilgan ko‘p qavatli kvartira qurilishi haqida xabar berilgandi.
Izoh (0)