Xivadagi Toshhovli saroyining Madaniy meros departamenti bilan kelishilmasdan buzilgan devorini tiklash ishlari yakuniga yetdi, deb xabar bermoqda “Kun.uz”.
Xiva shahrining YuNESKO ro‘yxatidagi Ichan-qal’a muzey-qo‘riqxonasida joylashgan saroy 1832—1838-yillarda qurilgan. Dekabr oyi boshida saroyning sharqiy qismidagi devorning bir qismi buzilgan edi.
Muzey-qo‘riqxona ma’muriyati buni devorning yuqori qismi 20 santimetrgacha og‘gani va so‘nggi vaqtlarda jarayon tezlashgani bilan izohladi. Restavratsiya Madaniy meros departamentidan beruxsat amalga oshirildi. Rekonstruksiya loyihasi ilmiy-ekspert kengashiga kiritilmagan.
Ma’lumot uchun, Ichan-qal’a davlat muzey-qo‘riqxonasidagi har qanday ta’mirlash-tiklash ishlari Madaniy meros departamenti qoshidagi Ilmiy-ekspert kengashi xulosasi asosida bajarilishi va YuNESKO bilan kelishilishi zarur. Ayni paytda departament ta’mirlash-tiklash ishlarini o‘tkazish bo‘yicha buyurtmachi va pudratchi tashkilotni sudga bergan.
Eslatib o‘tamiz, 2019-yilning avgustida Aleksandr Makedonskiyning yo‘qolgan shahri deya ta’riflangan Surxondaryo viloyatidagi Kampirtepa yodgorligining devori qulagandi. O‘sha yilning dekabrida Madaniyat vazirligi Toshhovli madaniy yodgorlikka o‘rnatilgan alyumin romni oldirib tashlagan edi.
Izoh (0)