Surxondaryo viloyati Muzrabot tumani “Obi hayot” mahallasida yashovchi fuqarolar 27-dekabr kuni elektr energiya ta’minotidagi uzilishdan norozi bo‘lib, ko‘chada balon yoqdi. Ushbu holat yuzasidan tuman hokimligi munosabat bildirdi.
Unga ko‘ra, 25-dekabr kuni mahalladagi quvvati 630 kVA transformatorning ishdan chiqishi oqibatida 26-dekabr kuni quvvati 400 kVA boshqa transformator o‘rnatilgan. Ammo elektr energiyasiga bo‘lgan ehtiyojning ortishi natijasida u ham ishdan chiqqan.
Xokimlik axborotiga ko‘ra, “Obi hayot” mahallasida 545 ta xonadon bo‘lib, ushbu hodisa oqibatida 165 ta xonadonning elektr ta’minotida uzilish yuzaga kelgan.
“Muammoni bartaraf etish maqsadida 27-dekabr kuni 630 kVA kuchlanishga ega yangi transformator o‘rnatilib, aholi elektr energiya bilan ta’minlangan”, — deyiladi xabarda.
Avvalroq Buxoro viloyatining Qorako‘l va Buxoro tumanlari aholisi gaz yo‘qligi sabab yo‘lni to‘sib qo‘ygan edi. Aholining so‘zlariga ko‘ra, tumanda olti kun umuman gaz bo‘lmagan.
Eslatib o‘tamiz, o‘tgan yili Andijon, Farg‘ona, Sirdaryo viloyatlari hamda Qoraqalpog‘istonda gaz va elektr energiyasi yo‘qligi sabab aholi yo‘llarni yopib qo‘yishgandi va shu orqali o‘z muammolariga hokimiyat vakillarini e’tiborini tortishga urinishgan edi.
Izoh (0)