Қашқадарё вилоятида 2020 йилнинг ўтган даври мобайнида оғир вазиятга тушиб қолган 160 нафар хотин-қиз уйли бўлди. Бу ҳақда «Дарё»га «Қишлоққурилишинвест» МЧЖ инжиниринг компанияси вилоят филиали директори Қўйли Нарзуллаев хабар берди.
Таъкидланишича, вилоятда 2020 йил Президент қарорига мувофиқ қиймати 241 миллиард 200 миллион сўм бўлган 1475 та арзон уй-жой қурилган.
«1475 та уйнинг 1080 таси қишлоқ жойларда намунавий лойиҳалар асосида қурилган арзон уй-жойлар бўлиб, 160 нафар оғир ижтимоий вазиятга тушиб қолган аёл, 10 та алоҳида намуна кўрсатаётган ёш оила, 910 та уй-жой шароитини яхшилашга муҳтож оилага берилди», — дейди филиал директори Қўйли Нарзуллаев.
Айтилишича, ана шундай уйлар 27 декабрь, якшанба куни Миришкор ва Шаҳрисабз туманларида фойдаланишга топширилган.
«Туманда кам таъминланганлар учун мўлжаллаб қурилган 24 хонадонли 2 та уйни қуриб битказдик ва аҳолига топширдик. Янги хонадонлар аҳоли учун Янги йил совғаси бўлса, ажабмас», — дейди қурувчи ташкилот раҳбари Муҳаммадқул Рўзимуродов.
Эслатиб ўтамиз, аввалроқ Қашқадарёда 2020 йил якунига қадар 1140 хонадонли 47 та арзонлаштирилган кўп қаватли квартира қурилиши ҳақида хабар берилганди.
Изоҳ (0)