Гулжаҳон Йўлдошева иши: Диспансер бош шифокори марҳумни кўчиришда вилоят ССБдан топшириқ бўлганини айтди

Тошкент вилояти юқумли касалликлар шифохонаси бош шифокори Гулжаҳон Йўлдошева иши бўйича навбатдаги суд мажлиси бўлиб ўтди. «Kun.uz»нинг хабар беришича, бу галги суд мажлисида Тошкент вилояти руҳий-асаб касалликлари диспансери бош шифокори ва диспансернинг бошқа ходимлари марҳум Фаррух Рустамовнинг касалхонага кўчирилиши билан боғлиқ ҳолатлар бўйича кўрсатма берди.

Тошкент вилояти руҳий-асаб касалликлари диспансери бош шифокори Феруза Шоносирова марҳум Фаррух Рустамовни шифохонага қабул қилгани ва бунга эътироз билдирмаганини таъкидлаган.

Феруза Шоносирова беморни диспансерга Тошкент вилояти соғлиқни сақлаш бошқармаси бошлиғининг биринчи ўринбосари Низом Абдуллаевнинг топшириғи билан қабул қилганини айтган.

Шунингдек, карантин даврида Тошкент вилояти юқумли касалликлар шифохонасида қоровул бўлиб хизмат қилган Фаррух Аширов марҳум Фаррух Рустамовни тез тиббий ёрдам машинаси олиб кетишга келганида Йўлдошевага телефон қилиб хабар беришга урунганини, беморни тез тиббий ёрдам машинаси олиб чиқиб кетаётган вақт Йўлдошевага қўнғироқ қилиб туша олмаганини билдирган.

Бу икки гувоҳдан ташқари, суд мажлисида диспансернинг яна 4 нафар вакили кўрсатма берган. Қолган гувоҳларнинг кўрсатмалари кейинги суд мажлисига қолдирилган.

Маълумот учун, вилоят ССБ бошлиғининг биринчи ўринбосари Низом Абдуллаев сентябрь ойида «Qalampir.uz»га берган интервьюсида беморни инфекцион касалхонадан руҳий диспансерга кўчириш «Гулжаҳон Йўлдошеванинг хатоси» бўлганини айтган эди.

Аввалги суд мажлисларида Гулжаҳон Йўлдошеванинг ўзи марҳумнинг ўлимига алоқаси йўқлигини таъкидлади. Унинг бу гапларини шифохона инфекционисти Шейхназар Рўзметов тасдиқлади.

Карантин даврида инфекцион шифохонада ҳамшира бўлиб ишлаган Айдана Есеналиеванинг айтишича, у Йўлдошеванинг марҳум Фаррух Рустамовни бошқа шифохонага кўчириш ҳақидаги гапини «эшитиб қолган». Йўлдошева бу гапни айтмаганини, Есеналиеванинг кўрсатмаси ёлғонлигини билдирган. Шифокор бу гапни қачон, қаерда, қайси тилда ва кимларнинг олдида айтгани ҳақида адвокат берган саволларга ҳамшира аниқ жавоб бера олмаган.

Эслатиб ўтамиз, коронавирусга чалинган бемор ўлими ва 250 миллион сўм бюджет маблағларини талон-торож қилганликда айбланиб, қамоққа олинган Тошкент вилояти бош инфекционисти Гулжаҳон Йўлдошевага нисбатан жиноят иши 2020 йил 11 августда Чирчиқ шаҳар прокуратураси томонидан қўзғатилган. 8 сентябрга келиб, эҳтиёт чораси сифатида айбланувчи қамоққа олинган эди.

Унинг қамоққа олиниши жамоатчилик ўртасида кенг муҳокамаларга сабаб бўлди. Бир қатор давлат ва нодавлат ташкилотларнинг раҳбарлари, хусусан, Сенат раиси Танзила Норбоева, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, гендер тенгликни таъминлаш масалалари бўйича комиссия аъзоси Саида Мирзиёева мазкур ҳодисага муносабат билдириб, прокуратурани шифокорга нисбатан қўлланилган эҳтиёт чорасини ўзгартиришга чақирган. Шундан сўнг Гулжаҳон Йўлдошева 6 октябрь куни уй қамоғига ўтказилганди.

Гулжаҳон Йўлдошева ва бошқаларга нисбатан суд жараёнлари 27 ноябрь куни бошланган.