Президент Шавкат Мирзиёев Ўзбекистон ёшлари форумига йиғилган йигит-қизлар билан мулоқот қилди. Тошкентдаги Humo Arena саройига келганлар ва ҳудудлардаги иштирокчилар ўз фикрларини, таклиф ва мулоҳазаларини баён этди. Бу ҳақда Президент матбуот хизмати хабар берди.
Давлат раҳбари барча долзарб ташаббусларни қўллаб-қувватлаб, улар бўйича мутасаддиларга шу ернинг ўзида кўрсатмалар берди.
«Форум давомида сизлар билан суҳбатлашган вазирлар менга саволларингни, фикрларингни айтиб берди. Давлат идоралари раҳбарлари ёшларнинг муаммоларини ота-она бўлиб, юрагидан ўтказиб, тизимли шуғулланмагани ҳақиқат. Энди ҳамма раҳбарлар ёшларнинг овозини эшитади, талабларини амалга оширади», — деди Шавкат Мирзиёев.
Президент форум давомида билдирилган фикрлар ҳар томонлама таҳлил қилиниб, тегишли қарорлар қабул қилинишини таъкидлади.
«Мен сизларга бир сиримни айтаман: ҳудудларга борганда кўпроқ ёшлар билан учрашишга, улар билан гаплашишга ҳаракат қиламан. Чунки мен сизлардай кўзи ёнган, юраги ёнган ёшларни излайман. Сизлар шунга муносибсизлар», — деди Президент.
Форумда Humo Arena саройига келган 3300, шунингдек, ҳудудлардаги студияларда 26 минг нафардан зиёд ёшлар иштирок этди.
«Бугун тарихий учрашувимиз. Келинглар, бу доимий бўлиб қолсин. Халқимиз меҳр кўзда дегандек, бир-биримизга меҳримиз абадий бўлсин», — дея сўзини якунлади Шавкат Мирзиёев.
Форум иштирокчиларининг мамлакат ёшларига мурожаати қабул қилинди. Тадбир якунида концерт дастури намойиш этилди.
Мавзуга доир:
- Шавкат Мирзиёев Тошкент шаҳрида замонавий, муҳташам кутубхона барпо этишни таклиф қилди
- Халқаро таълим дастурлари бўйича энг юқори балларни тўплаган ёшларга имтиҳон топшириш харажатлари тўлиқ қоплаб берилади – Шавкат Мирзиёев
- Шавкат Мирзиёев 2021 йилда камида 500 минг нафар ёшни иш билан таъминлаши мумкин бўлган дастурни маъқуллади
- «Ёшлар мурожаати» электрон платформаси яратилади – Шавкат Мирзиёев
Изоҳ (0)