Гана Республикаси фуқаролари — Эммануэль Аквей ҳамда Суссанна Мфумларнинг Андижон шаҳрида туғилган фарзандларига туғилганлик ҳақидаги гувоҳномалар берилди. Бу ҳақда «Дарё» мухбири Умиджон Мамарасулов хабар берди.
ДХА Андижон вилоят бошқармаси ахборот хизматининг маълумот беришича, 2020 йил 23 декабрь куни Андижон шаҳар фуқаролик ҳолатлари далолатномаларини ёзиш бўлимига Гана Республикаси фуқаролари — Эммануэль Аквей ҳамда Суссанна Мфумлар вилоят перинатал марказида туғилган фарзандларига гувоҳнома сўраб, мурожаат қилган.
Уларнинг мурожаати ФҲДЁ бўлими томонидан тегишли тартибда кўриб чиқилиб, болаларнинг ҳақиқатан ҳам Андижон шаҳрида туғилганлиги тасдиқлангач, далолатнома ёзувлари қайд этилган.
24 декабрь куни ДХА Андижон вилоят бошқармаси бошлиғи Маҳмуджон Абдижалиев томонидан хорижлик фуқароларнинг Марвен ва Арвен исмли ўғилларига туғилганлик ҳақидаги гувоҳномалари топширилган.
«Ўзбекистонга 2020 йилнинг март ойларида оилам билан келгандик. АҚШлик кўнгиллилар орасида ўзбекистонлик ўқувчиларга инглиз тилини ўргатишни мақсад қилгандик. Айни пайтда Андижон шаҳридаги 43-умумий ўрта таълим мактабида ўқувчиларга инглиз тилидан сабоқ беряпмиз. Шу кунга қадар ўнлаб ўқувчиларимиз чет тилини билишини тасдиқловчи сертификатларга эга бўлди. Жорий йилнинг 28 сентябрь куни турмуш ўртоғим Сусанна фарзандларимизни дунёга келтирди. Бугун уларнинг туғилганлиги қайд этилганидан хурсандмиз. Боиси юртимизга қайтганимизда уларни рўйхатга олишда қийинчиликлар вужудга келмайди. Ишимиз осон ҳал бўлганидан хурсандмиз», — дейди Эммануэль Аквей.
Андижон шаҳар ФҲДЁ бўлими мудираси Дилёрахон Каримованинг қўшимча қилишича, 2020 йилнинг 27 ноябрь куни Молдова Республикаси фуқаролари Николай Сарбон ва Анастасия Преидаларнинг 2020 йил 15 февраль куни Андижон шаҳрида туғилган фарзанди Василий Преиданинг ҳам туғилганлиги бўлимда қайд этилган.
Изоҳ (0)