Navoiy viloyatida 500 MVt quvvatga ega shamol elektr stansiyasini qurish va ekspluatatsiya qilish bo‘yicha investitsiya shartnomasi O‘zbekiston Prezidentining 22-dekabrdagi farmoni bilan tasdiqlandi, deb xabar bermoqda “Gazeta.uz”.
Ushbu loyihani amalga oshirish bo‘yicha kelishuv BAAning Masdar kompaniyasi (Abu Dhabi Future Energy Company) tomonidan yanvar oyida imzolangan. O‘sha vaqtda elektr stansiyasi quvvati 400 MVtni tashkil etishi aytilgandi. Qurilishga 600 million dollar miqdoridagi to‘g‘ridan to‘g‘ri xorijiy investitsiyalar jalb etiladi.
Investitsion loyihani amalga oshirish maqsadida Masdar O‘zbekistonda Shamol Zarafshan Energy loyiha kompaniyasini tashkil etgan.
Iyun oyida “O‘zbekiston milliy elektr tarmoqlari” va Masdar elektr energiyasini sotib olish to‘g‘risida bitim imzolangan bo‘lib, unga muvofiq Shamol Zarafshan Energy O‘zbekistonda ishlab chiqarilgan elektr energiyasini kafolatlangan tarzda sotib olish majburiyatini olgan. Bu haqda Prezidentning 22-dekabrdagi farmonida belgilangan.
Keyinchalik loyiha kompaniyasi va “O‘zbekiston milliy elektr tarmoqlari” investitsiya loyihasini amalga oshirish uchun xalqaro mustaqil injiniring kompaniyasini tanlab oladi.
Yil boshida ushbu obyekt 2022-yilda foydalanishga topshirishi rejalashtirilgani ma’lum qilingandi.
Eslatib o‘tamiz, BAAning Masdar kompaniyasi, shuningdek, Navoiy viloyatida umumiy quvvati 100 MVt bo‘lgan fotoelektr stansiyasi quradi. U 2021-yildan boshlab O‘zbekistonning elektr tarmoqlarini energiya bilan ta’minlashni boshlash kutilmoqda.
Izoh (0)